ЖИ бойынша спорт журналистеріне арналған ерекше тренинг өтті

БАҚ қызметкерлерінің күні мен халықаралық спорт журналистері күніне орай SportQory жаңа форматтағы іс-шара өткізді, деп хабарлайды El.kz интернет порталы.

«Жасанды интеллект – спорт журналисінің жаңа көмекшісі» атты 2 сағаттық практикалық тренинг – заманауи технологияларды меңгеріп, кәсіби қабілетті жаңа деңгейге көтеруге таптырмас мүмкіндік болды.

Тренинг барысында қатысушылар ChatGPT және басқа ЖИ құралдарын тиімді пайдалану жолдары; спорт жаңалықтары, әлеуметтік желіге арналған посттар, тақырыптар мен аналитикалық материалдар дайындау тәсілдері; уақыт үнемдеуге көмектесетін лайфхактар мен нақты мысалдар бойынша тақырыптарды меңгерді. Тренингті медиа саласындағы танымал сарапшы, цифрлық журналистика мен жасанды интеллект бойынша тәжірибелі маман Аршат Оразов өткізді.

Жасанды интеллект – болашақтың құралы. Журналистикада оны дұрыс қолдана білген маман – әрқашан бір қадам алда болмақ. Тренингке қатысқан журналистерге арнайы сертификаттар табыс етілді.