Жемқорлыққа қарсы іс-қимыл тетіктерін жетілдіру шаралары талқыланды

Астанада Сыбайлас жемқорлыққа қарсы қызмет және халықаралық ұйымдардың сарапшылары сыбайлас жемқорлыққа қарсы іс-қимыл тетіктерін жетілдіру бойынша одан әрі шараларды талқылады, деп хабарлайды El.kz ақпарат агенттігі. 

Агенттік төрағасы Олжас Бектенов ғылыми-практикалық конференцияны аша отырып, сыбайлас жемқорлыққа қарсы шешуші жұмыстың драйвері Мемлекет басшысының қолдауы болып табылатынын атап өтті.

Конференция барысында сыбайлас жемқорлыққа қарсы қызмет жұмысының нәтижелері айтылды, олардың ішінде сыбайлас жемқорлыққа қарсы заңнаманың айтарлықтай жетілдірілгенін атап өтуге болады.

Сондай-ақ, Антикор басшысы құқық қорғау органдары қызметкерлері мен судьялар, пара берушілер мен делдалдар арасында сыбайлас жемқорлық үшін санкциялардың күшейтілгенін еске салды.

Ауыр және аса ауыр сыбайлас жемқорлық қылмыстары бойынша сотталғандар үшін мерзімінен бұрын босатуды қолдану мүмкіндігін болдырмау заңнаманың негізгі күшеюінің бірі болып табылады.