Жасөспірімдер жеңісі

Алғаш рет ауыр атлетикадан Қазақстанның жасөспірімдер құрамасы Бангкокта өткен әлем біріншілігінде үшінші орынға қол жеткізді. Олардың еншісінде барлығы 6 жүлде бер, оның 3-і алтын, күміс және қос қола медаль.

16 жастағы Анатолий Савельев 62 келі салмақта 281 келіні (127+154) бағындырып, қоржынға алғашқы алтын жүлдені салған еді. 85 келіге дейінгі салмақта сынға түскен Артем Антропов 323 келіні (138+185) еңсеріп, екінші алтынға қол жеткізді.

Қыздар арасында 75 кг. дейінгі салмақта бақ сынаған 15 жасар Ольга Пастухова 211 келі (91+120) көрсеткішімен бірінші орынға табан тіреді.

62 кг. категориясында Дарья Павлова 201 кг (90+111) нәтижесімен күміспен күптелді.

77 келі салмақ дәрежесінде Асылжан Бектай 306 (140+166) ұпаймен үшінші тұғырдан көрінді.

69 келі салмақтағы қыздар арасындағы додада тағы бір отандасымыз Карина Кузганбаева қос сайыс (94+113) нәтижесі бойынша қоржынға екінші қоланы салды.

Осылайша, ерлер мен қыздар құрамасы да үшінші сатыға жайғасып, өрендеріміздің нәтижесі  2018 жылғы жасөспірімдер Олимпиадасына ауыр атлетикадан барлық лицензияны жеңіп алуға мүмкіндік берді.