Жасанды интеллект көмегімен ауруларды ерте анықтауға болады

Chan Zuckerberg Initiative (CZI) зерттеу ұйымы жасушадағы процестерді тереңірек зерттеу және аурулардың дамуына ықпал ететін тетіктерді анықтау үшін GREmLN атты жаңа жасанды интеллект моделін әзірледі, деп хабарлайды El.kz интернет порталы.

Зерттеу нәтижелері bioRxiv препринт платформасында жарияланды.

GREmLN қатерлі ісік, нейродегенеративті аурулар және өзге де патологиялардың дамуымен байланысты механизмдерді анықтауға арналған. Дәстүрлі ірі деректерді талдау әдістерінен айырмашылығы, бұл модель гендер арасындағы өзара әрекеттесу желілерін дербес құрастырады. Осы тәсіл аурудың бастапқы кезеңінде жасушалардың жұмысындағы өзгерістерді анықтап, терапияға арналған әлеуетті нысаналарды табуға мүмкіндік береді.

Модельді оқыту үшін CellxGene платформасының деректері пайдаланылған. Бұл – біржасушалық зерттеулерге арналған жүздеген ашық деректер жиынтығын қамтитын онлайн-ресурс. Платформада ми, өкпе, бүйрек, қан және басқа да ағзалардың 93 миллион бірегей жасушасы туралы мәліметтер бар.

Сонымен қатар, платформада TranscriptFormer сияқты өзге де модельдер ұсынылған. Олар әртүрлі тірі ағзалардың генетикалық деректерін біріктіріп, жасушалардың жұмысын жан-жақты зерттеуге мүмкіндік береді. Барлық құралдар зерттеушілер үшін ашық әрі қолжетімді. Оларды ауруларды ерте диагностикалау, дәріге жасушалық жауапты болжау және жекелендірілген емдеу әдістерін әзірлеу үшін пайдалануға болады.