Зейнеткер шие ұрлаған балаларға оқ жаудырды

Ресейдің Пролетарск қаласында зейнеткер өз үйінің жанында шие терген мектеп оқушыларына оқ атқан, деп хабарлайды El.kz ақпарат агенттігі.

Төрт оқушы қыз серуендеп келе жатып, зейнеткердің үйінің жанында өсіп тұрған шиені көріп, тере бастаған. Сол сәтте ер адам "ұрлыққа түскен" қыздарды жақтырмай, аспанға, қоршауға оқ жаудырады. Адасқан оқ бір оқушының иығына тиген. 

Құқық қорғаушылар атқыштың кім екенін жылдам анықтады: ол сол маңдағы қария болып шықты. Зейнеткер балаларды көздеген жоқ екенін, тек ауаға және қоршауға оқ атқанын айтып түсіндірген.

Қазір оқиға бойынша тергеу жүргізілуде, бұзақылық бабымен қылмыстық іс қозғау мәселесі қарастырылып жатыр.

Бұған дейін тұрғын үй құлап, бірнеше адам қаза тапқанын мәлімдеген едік.