YouTube ЖИ негізінде кәмелетке толмағандарды қадағалауды бастады

АҚШ-та YouTube платформасы жасанды интеллект (ЖИ) көмегімен қолданушылардың жасын анықтайтын жаңа жүйені іске қосты, деп хабарлайды El.kz интернет порталы.

Бұл бастама кәмелетке толмағандарға белгілі бір функциялар мен мазмұн түрлеріне шектеу қою мақсатында енгізілген. Ең бастысы — пайдаланушының профиліндегі туған күні 18 жастан асқанын көрсетсе де, алгоритмдер оның шынайы жасын талдап, қауіпсіздік шараларын автоматты түрде іске қосады. 

Жаңа жүйе пайдаланушының 18 жасқа толмағанын анықтаса, оның аккаунтына бірқатар шектеулер енгізіледі:

• Жеке емес жарнама ғана көрсетіледі;
• Экран алдындағы уақытты бақылау мақсатында бейнеролик қарау кезінде үзіліс жасауға шақыратын ескертулер шығады;
• Бейнежазба жүктеу немесе пікір қалдыру кезінде құпиялық туралы ескертулер автоматты түрде пайда болады;
• Жасы 18+ деп белгіленген бейнероликтерге қолжетімділік толық жабылады, ал күмәнді немесе ықтимал қолайсыз контент сирек ұсынылады.

Қате жас анықталған жағдайда — верификация мүмкіндігі бар

Жасанды интеллект алгоритмдері қате жас анықтаса, пайдаланушы өзінің жасын арнайы тексеру рәсімі арқылы дәлелдей алады. Бұл үшін келесі тәсілдер қолжетімді:

• Үкімет берген жеке куәліктің фотосын жүктеу;
• Селфи суреті арқылы сәйкестендіру;
• Немесе кредиттік карта деректерімен растау, ол пайдаланушының кәмелетке толғанын дәлелдейді.

YouTube өкілдерінің айтуынша, жинақталған жеке мәліметтер жарнамалық мақсатта пайдаланылмайды, әрі жүйенің қауіпсіздігі заманауи киберқорғаныс әдістерімен қамтамасыз етілген. Алайда бұл сендірулерге қарамастан, цифрлық құпиялық саласындағы сарапшылар мен кейбір қолданушылар өз қауіптерін білдіріп отыр.

Платформаға бойкот жариялауға шақырулар күшейіп жатыр

Жаңа жүйе іске қосылғаннан кейін кейбір қолданушылар автоматты түрде шектеулерге ұшырағанын хабарлады. Reddit платформасында 20uptilts лақап атты қолданушы өз аккаунтына қолжетімділіктің шектелгенін жазды. Оның айтуынша, өзі тұтынатын мазмұн негізінен деректі, тарихи және саяси жаңалықтар бағдарламаларынан тұрады.

Сондай-ақ, пайдаланушылар арасында YouTube интерфейсіндегі ескерту терезелерінің визуалдық безендірілуіне қатысты сын күшейді. Көпшілік көрнекі элементтердің тартымсыз әрі шала дайындалғанын айтып, сынға алды.