XII Азаматтық форум қарсаңында сауда және азаматтық сектор алдында тұрған міндеттер талқыланды

ХII Азаматтық форум қарсаңында ҚР Сауда және интеграция министрі Арман Шаққалиев үкіметтік емес ұйымдар, бизнес-қоғамдастықтар мен салалық қауымдастықтардың өкілдерімен кездесу өткізді, деп хабарлайды El.kz интернет порталы.

Кездесу барысында ішкі сауданы дамыту, отандық өндірушілердің үлесін арттыру және саланы реттеу тетіктерін жетілдіру мәселелері талқыланды. Министр Мемлекет басшысы айқындаған стратегиялық басымдықтардың бірі – азық-түлік қауіпсіздігін қамтамасыз ету және ішкі нарықтағы отандық тауарлардың үлесін арттыру екенін атап өтті.

Кездесу барысында қатысушылар азық-түлік қауіпсіздігі елдің орнықты дамуының маңызды құрамдас бөлігі екенін атап өтті. Бұл үшін отандық өнімнің бәсекеге қабілеттілігін, сапасын және қолжетімділігін бақылау қажет. Мемлекет, бизнес және азаматтық сектордың күш-жігерін біріктіре отырып, ішкі нарықтың орнықты моделін қалыптастырып, отандық өндірістің өсуіне жағдай жасай алады.

Кездесу қорытындысы бойынша тараптар ұлттық өндірушілерді қолдауға және әділ әрі бәсекеге қабілетті сауда ортасын дамытуға бағытталған форум аясында жүйелі байланысты жалғастыруға дайын екендігін білдірді.