Ұлттар лигасы: Хорватия құрамасы финалға шықты

Футболдан Хорватия құрамасы UEFA Ұлттар лигасы финалына берілген алғашқы жолдамаға ие болды, деп хабарлайды El.kz ақпарат агенттігі.

Хорватиялық футболшылар жартылай финалда Нидерланд құрамасымен кездесті. Ойынның негізгі кезеңі 2:2 есебімен аяқталды.

Нидерланд сапынан Дониэлл Мален – 34, Ноа Ланг 96-минутта мергендік танытса, оған хорватиялық Андрей Крамарич – 55, Марио Пашалич 72-минутта екі голмен жауап қайырды. Ал қосымша кезеңде Бруно Петкович – 98, Лука Модрич 116-минутта пенальтиден соққан голы қорытынды есепті белгіледі. Осылайша, Хорватия қарсыласынан 4:2 есебімен басым түсіп, финалға шықты.

Енді маусымның 15-нен 16-на қараған түні Испания мен Италия финалдың екінші жолдамасын алу үшін ойын өткізеді.