Уәдесінде тұрды: Михаил Шайдоров жас спортшыларға 6 миллион теңге үлестірді

Мәнерлеп сырғанаудан Олимпиада чемпионы Михаил Шайдоров 30 балаға спорттық жабдықтарға арналған сертификат табыстап, уәдесінде тұрды. 

Бұған дейін Туризм және спорт министрлігі Михаил Шайдоровпен келісімшартқа қол қойылғанын хабарлаған болатын. Алайда спортшы бұл жаңалыққа қатысты бірден пікір білдірмеген еді. Үш күннен кейін Олимпиада чемпионы Алматы қаласындағы №3 спорт мектебінің жас мәнерлеп сырғанаушыларына сыйлықтар табыстап жатқан видеосын жариялады.

Шайдоров бұған дейін маусымға қажетті қаржыландыру мәселесі шешіліп, оқу-жаттығу жиындарын ұйымдастыруға мүмкіндік жасалса, төленбеген жалақысын балаларды қолдауға жұмсайтынын айтқан еді.

Егер маусымға қаржыландыру алып, барлық дайындық пен оқу-жаттығу жиындарын ұйымдастыру мәселесі шешілсе, төленбеген жалақымның бәрін Балаларды қорғау күніне орай балаларды қолдау мен оларға көмек көрсетуге бағыттаймын деп шештім, – деген болатын спортшы.

Кездесу барысында Олимпиада чемпионы жас мәнерлеп сырғанаушылармен әңгімелесіп, оларға алдағы жарыстарда сәттілік тіледі.

Бүгін Алматы қаласының №3 спорт мектебінде мәнерлеп сырғанайтын балалармен кездесіп, Халықаралық балаларды қорғау күніне орай оларға спорттық құрал-жабдықтарға сертификаттар бердім. Қолдау көрсеткендеріңіз үшін баршаңызға рақмет! Балаларға оң эмоциялар мен өздеріне деген сенімділік сыйлай алғаныма өте қуаныштымын. Мен біздің керемет спортымызда көбірек балаларды қолдауға тырысамын, – деп жазды Шайдоров.

«Спорт Шрёдингера» басылымының мәліметінше, 30 жас спортшының әрқайсысына 200 мың теңгелік сертификат табысталған. Осылайша Олимпиада чемпионы жас спортшыларға жалпы сомасы 6 миллион теңгенің сертификатын сыйлады.