Тістің саулығы жүрекке қалай әсер етеді? Мамандар жауап берді

Тістердің түзу әрі сау болуы күлкіге, ауыз иісіне немесе тамақты жайлы шайнауға ғана әсер етпейді. Дәрігерлер ауыз қуысы мен жүрек саулығының арасында тікелей байланыс бар екенін айтуда. Бүгінде жүрек-қан тамыр аурулары көбейіп келеді, ал инфаркт тіпті жастар арасында да жиілеп барады, деп хабарлайды El.kz интернет порталы.

Алғаш қарағанда, тістер мен жүректің еш байланысы жоқ сияқты көрінуі мүмкін. Алайда мамандардың айтуынша, емделмеген тіс жегісі қауіпті асқынуларға алып келуі ықтимал. Бұл туралы мамандар пікір білдірді.

Жүрек пен кариестің арасындағы байланыс бар. Себебі инфекция ауыз қуысынан, яғни тістерден қан арқылы жүрекке жетіп, инфекциялық эндокардитке әкеледі. Бұл – жүректің ішкі қабаты мен қақпақшаларының қабынуы. Мұндай қабыну тромб түзілуіне себеп болып, инсульт пен инфаркттің жиі кездесетін себебіне айналады, - дейді стоматолог Рахила Ахметова.

Қауіп тобына кімдер кіреді?

Мамандардың айтуынша, жүректің созылмалы аурулары бар адамдар ауыз қуысындағы инфекциялар алдында ерекше осал. Тіпті шағын қабыну ошағы да ауыр асқынуларды туындатуы мүмкін.

Тәуекелді арттыратын факторлар:

• иммунитеттің әлсіреуі,
• қант диабеті,
• шылым шегу,
• ауыз қуысының тұрақты гигиенасын сақтамау.

Кардиологтар да стоматологиялық аурулардың қаупін растайды.

Fуыз қуысында созылмалы қабынуы бар науқастарда жүрек-қан тамыр аурулары асқынатынын жиі байқаймыз. Инфекциялық эндокардит – ең ауыр асқынулардың бірі, ал оның себебі емделмеген тіс жегісінде болуы мүмкін, - деп түсіндіреді кардиолог Марат Кенжебаев.

Дәрігерлердің кеңесі

Жүректі қорғау үшін алдымен тістерге күтім жасау қажет. Негізгі ережелер мыналар:

• тістерді күніне екі рет тазалау,
• тіс жібі мен шаюға арналған сұйықтықты пайдалану,
• стоматологқа алдын ала тексеруге жылына кемінде екі рет бару,
• кариес бастапқы сатысында-ақ дер кезінде емдеу.