Теннистен Қазақстан құрамасының капитаны ауысты

Қазақстан теннис федерациясы басшылығының шешімімен Қазақстан әйелдер құрамасына Юрий Щукин жетекшілік ететін болды, деп хабарлайды El.kz ақпарат агенттігі. 

Қазақстан теннис федерациясының мәліметінше, бұған дейін Қазақстан әйелдер құрамасына Ярослава Шведова басшылық етіп келген болатын.

Шведова 2020 жылдың ақпанынан 2021 жылдың сәуіріне дейін әрі капитан, әрі ойыншы ретінде қызмет атқарды. Кейін капитандыққа біржола ауысты. 

Кейінгі жылдары әйелдер құрамасында Юрий Щукин көмекші бапкер ретінде жұмыс істеді. Ол сондай-ақ 2020 жылдың наурызынан бері Қазақстан ерлер құрамасын басқарады. 

Қазақстан теннис федерациясының вице-президенті Диас Досқараев кадрлық өзгеріске қатысты пікірін білдірді.

Әйелдер құрамасында түбегейлі ештеңе өзгерген жоқ. Бұрын әйелдер құрамасында Юрий бапкер, Ярослава капитан еді. Енді, керісінше, Щукин басшылық тізгінді қолға алып, Шведова оған жәрдемдесетін болады. Былайша айтқанда, кадрлар орнын ауыстырды, бұл құраманың биылғы маусымда табысты өнер көрсететініне септеседі деп үміттенеміз, - деді Досқараев.