Таразда қарасора өсіретін жабдықталған фитозертхана жұмыс істеген

Таразда қарасора өсіретін жабдықталған фитозертхана анықталды, деп хабарлайды El.kz ақпарат агенттігі Polisia.kz сайтына сілтеме жасап.

Жамбыл облысында тыйым салынған өсімдіктерді заңсыз өсіру дерегі анықталды. Тараз қаласының 38 жастағы тұрғыны сарайының жертөлесінде қарасора өсіруге арналған фитозертхана ұйымдастырған.

Тұрғылықты жерін тінту барысында полиция қызметкерлері 9 түп қарасора, екі өскін, 1 көкнәр бұтасын тауып тәркіледі.

Ол есірткі өсімдіктерін өсіруге арналған бөлмені желдету жүйесімен, жылыту құрылғысымен, шамдармен арнайы жабдықтаған.

Күдіктінің айтуынша, өзі жеке тұтыну үшін есірткі шөбін үйде өсіруді ұйымдастырған. Ол қарасораның тұқымдарын интернет желісі арқылы тапсырыс беріп алдырған. Тағы бір заттай айғақ ретінде ер адамның қарасораны өсіру бойынша өз қолымен жазған нұсқаулығы бар бір парақ қағаз табылды.

Ұсталған ер адам кінәсін мойындады. Оған қатысты аса ірі мөлшерде есірткі заттарын заңсыз дайындау, сақтау дерегі бойынша сотқа дейінгі тергеу амалдары басталды. Сондай-ақ сот-химиялық сараптамасы тағайындалды", - деп хабарлады Жамбыл облысының ПД Есірткі қылмысына қарсы іс-қимыл басқармасының бастығы полиция полковнигі Әлім Бажықбаев.