СҚО-да сүт фермалары цифрлық технологияларға көшіп жатыр: өндіріс қалай өзгереді?

Солтүстік Қазақстан облысындағы сүт фермаларында жануарлардың денсаулығын бақылау және сүт өнімділігін қадағалау үшін цифрлық жүйелер енгізіліп жатыр. Бұл технологиялар өндірісті автоматтандыруға және ресурстарды тиімді пайдалануға мүмкіндік береді.

«Атамекен-Агро-Қорнеевка» кәсіпорнында DairyPlan және CowScout жүйелері қолданылады. Олардың көмегімен мамандар сиырлардың жағдайын және сүт өнімділігінің көрсеткіштерін бақылап, табынды басқаруға қажетті ақпарат алады.

«СК Агро 2050» ЖШС-де 100 басқа арналған «Карусель» автоматтандырылған сауу қондырғысы жұмыс істейді. Мұндай жабдық көп мөлшердегі малды жүйелі түрде саууға мүмкіндік береді.

Тағы бір ірі жобаны «Зенченко және К» КТ жүзеге асырып жатыр. Кәсіпорын 9 мың басқа арналған сүт-тауар фермасын салуда. Нысан іске қосылғаннан кейін жылына 38 мың тоннаға дейін сүт өндіре алады.

Цифрлық технологиялар жануарлардың жағдайын жедел бақылауға, ресурстарды ұтымды пайдалануға және еңбек өнімділігін арттыруға мүмкіндік береді, – деді Солтүстік Қазақстан ауыл шаруашылығы тәжірибе станциясының директоры Виталий Заика.

Маманның айтуынша, цифрлық шешімдер шаруашылықтарға жануарларды бақылау мен жабдықтарды пайдалануды қоса алғанда, өндірістік үдерістерді тиімді басқаруға жол ашады.

Сүт фермаларының дамуы Қазақстанда ауыл шаруашылығы өндірісінің өсуімен қатар жүріп жатыр. 2025 жылдың қорытындысы бойынша саланың жалпы өнім көлемі 9,8 трлн теңгеге жетіп, 2019 жылғы көрсеткіштен екі есеге жуық артты.

Өткен жылы агроөнеркәсіптік кешенді жеңілдікпен қаржыландыруға 1 трлн теңгеге дейін қаражат қарастырылған. Бұл қаржының бір бөлігі жабдықтарды жаңартуға және инвестициялық жобаларды іске асыруға бағытталған.

Мемлекеттік қолдау шаруашылықтарға өндірісті жаңғыртуға, жабдықтарды жаңартуға және ірі инвестициялық жобаларды жүзеге асыруға қосымша мүмкіндік береді, – деп атап өтті Виталий Заика.