Сингапурда терезелерді енді дрондар жуады

Сингапурда ғалымдар терезелерді жууға арналған жаңа технология ойлап тапты – енді бұл жұмысты арнайы дрондар атқарады, деп хабарлайды El.kz интернет порталы.

Бұл туралы Сингапур саясаткері Сун Сюэлин (Sun Xueling) өзінің Facebook парақшасында хабарлады.

Дәстүрлі әдістерде ғимарат қасбеттерін жуу үшін арқанмен ілініп жұмыс істейтін адамдар мен арнайы платформалар қолданылады. Өкінішке қарай, мұндай тәсіл қызметкерлердің өміріне үлкен қауіп төндіреді. Қазір біз көпқабатты үйлердің қасбеттерін жууға арналған дрондарды сынақтан өткізіп жатырмыз. Бұл процесс су қысымын және арнайы ерітінділерді қолдануды қамтиды, - деп жазды Сюэлин.

Саясаткердің айтуынша, дрондарды сынақтан өткізгеннен кейін билік тұрғындардың пікірін зерттеп, жаңа технологияны енгізу құнын есептемек. Осыдан кейін ғана оны ресми түрде қолдану туралы шешім қабылданады.