Шымкентте полицейлер өртенген үйден тұрғындарды құтқарды

Шымкентте полицейлер өртенген үйден тұрғындарды құтқарды, деп хабарлайды El.kz ақпараттық агенттігі.

Полиция дерегінше, 1 қараша түнде полиция департаментінің “102” арнасына Нұрсәт шағын ауданындағы 9 қабатты тұрғын үйде өрт шыққаны туралы хабарлама келіп түсті. Оқиға орнына бірден патрульдік полиция полкінің қызметкерлері мен Қаратау АПБ-ның учаскелік инспекторлары барды.

Тәртіп сақшылары ойланбастан түтінге оранған ғимараттың ішіне кіріп, тұрғындарды эвакуациялауға кірісті. Инспекторлар түтін басқан пәтерлерден кішкентай балаларды көтеріп алып шықты.

Осылайша, полицейлер үйдегі барлық тұрғынды жедел әрі ұйымдасқан түрде сыртқа шығарды. Қазір олардың өмірі мен денсаулығына ешқандай қауіп төніп тұрған жоқ. Өрт сөндірушілер өртті толығымен сөндірді.