Шығыс Қазақстанда жаза басқан мемқызметшілер жауапқа тартылды

Шығыс Қазақстан облысында былтыр жиырмадан астам мемлекеттік қызметші әкімшілік жауапкершілікке тартылған, деп хабарлайды El.kz ақпараттық агенттігі Altaynews.kz-е сілтеме жасап. 

Облыс бойынша Тарбағатай, Самар, Шемонаиха аудандарының мемлекеттік қызметшілеріне қатысты әкімшілік хаттамалар толтырылып, салынған айыппұлдан сомасы бір миллион теңгеден асқан. 
 
2023 жылдың басынан бастап ҚР ӘҚБтК 680-бабы бойынша аудандар әкімдіктерінің дербес бөлімдерінің төрт басшысы әкімшілік жауапкершілікке тартылды. Салынған айыппұлдардың жалпы сомасы - 1 035 000 теңге", - деп жазылған ШҚО сыбайлас жемқорлыққа қарсы қызметі таратқан ақпаратта. 

Былтыр жиырмадан астам мемлекеттік қызметші әкімшілік жауапкершілікке тартылды. Оның 14-і кәсіпкерлік қызметпен заңсыз айналысқаны үшін жазаланды. Жалпы, олардан 6 млн теңгеден астам қаражат өндірілген. 

Бұдан бөлек, үш мемлекеттік қызметшіге қатысты ҚР ӘҚБтК-нің 676-бабы бойынша әкімшілік хаттама жасалды (жеке тұлғалардың заңсыз материалдық сыйақы беруі). Мемлекет кірісіне 918 900 теңге өндірілді.

ШҚО қалалары мен аудандарының білім бөлімдерінің тағы алты басшысына ҚР ӘҚБтК-нің 680-бабы бойынша айыппұл салынды (іс жүзінде адамды лауазымға тағайындау, активтер мен міндеттемелер туралы декларациясыз). Өткен жылы айыппұлдардың жалпы сомасы 7,84 млн теңгені құрады.