Шираз Жәнібектен қашты ма? Британдық чемпион белбеуін тастап кетті

Британдық боксшы Хамза Шираз Жәнібек Әлімханұлына қарсы міндетті титул қорғау жекпе-жегін өткізуден бас тартып, екінші орта салмақтағы WBO әлем чемпионы атағын өз еркімен босатты.

Осылайша екі жеңілмеген боксшы арасындағы көптен күткен кездесу өтпейтін болды. Енді қазақстандық боксшының чемпиондық белбеу үшін кіммен жұдырықтасатынын Дүниежүзілік бокс ұйымының Чемпиондық комитеті анықтайды.

WBO таратқан ресми мәліметке сәйкес, Шираздың мүддесін қорғайтын Queensberry Promotions компаниясы промоутерлік сауда аяқталғаннан кейін ұйымға жазбаша хабарлама жолдаған. Онда британдық боксшының Әлімханұлына қарсы міндетті қорғаудан бас тартқаны және чемпиондық атағын босатқаны айтылған.

Ұйым мәлімдемесінде Шираздың командасы промоутерлік сауда қорытындысында қалыптасқан қаржылық және ұйымдастырушылық шарттарды қарастырғаннан кейін осындай шешім қабылдағаны көрсетілді.

WBO британдық боксшы мен оның командасының шешімін құрметтейтінін мәлімдеді. Ал бос қалған чемпиондық белбеудің әрі қарайғы тағдырына қатысты ресми шешімді ұйымның Чемпиондық комитеті 21 қыркүйекте жариялауы тиіс.

Бұған дейін WBO Шираз бен Әлімханұлының командаларына жекпе-жекті өзара келісіп ұйымдастыруға мүмкіндік берген. Алайда тараптар белгіленген мерзім ішінде ортақ келісімге келе алмады. Осыдан кейін ұйым чемпиондық жекпе-жекті промоутерлік саудаға шығарды.

Саудада Шираздың промоутері Queensberry Promotions жеңіске жетіп, жекпе-жекті ұйымдастыру құқығы үшін 1 001 809 доллар ұсынды. Ал Жәнібектің мүддесін қорғайтын Top Rank компаниясының ұсынысы 820 мың доллар болды.

Кездесудің ықтимал мерзімі ретінде 28 қараша мен 5 желтоқсан қарастырылған. Жекпе-жекті Ұлыбританияда немесе Нью-Йоркте өткізу мүмкіндігі талқыланды.

Алайда промоутерлік сауда аяқталғаннан кейін жағдай күрт өзгерді. Жәнібектің командасы жекпе-жекке дайын екенін растағанымен, Шираз ақырында чемпиондық белбеуден бас тартуды таңдады.

Жәнібек Әлімханұлының промоутері Top Rank WBO-ға арнайы хат жолдап, қазақстандық боксшының промоутерлік сауда қорытындысы бойынша белгіленген шарттарға сәйкес жекпе-жек өткізуге дайын екенін хабарлаған.

WBO президенті Густаво Оливьери де Әлімханұлының чемпионмен кездесу құқығынан бас тартпағанын мәлімдеген еді. Қазақстандық боксшының тарапы Ширазбен жұдырықтасуға дайын, ниетті және жекпе-жекті өткізуге мүмкіндігі бар екенін ресми түрде жеткізген.

Жәнібектің өзі де бұған дейін Ширазбен жеке араздығы жоқ екенін айтып, мақсаты тек чемпиондық белбеу екенін мәлімдеген.

«Ол менің жауым емес. Маған тек оның титулы керек. Болды. Ешқандай жеке мәселе жоқ», – деген еді Әлімханұлы әлеуметтік желідегі жазбасында.

Осы мәлімдеме арқылы қазақстандық боксшы қарсыласымен арадағы текетіресті жеке жанжалға айналдырмайтынын, басты мақсаты екінші орта салмақта әлем чемпионы атану екенін аңғартқан.

Шираз жекпе-жектің өтпеуі мүмкін екенін алдын ала айтқан

Шираз промоутерлік саудаға дейін-ақ Әлімханұлымен жекпе-жектің өтетініне күмән келтірген болатын. Ол ұсынылатын қаржылық шарттар шешуші рөл атқаратынын жасырмаған.

Британдық боксшы келіссөздер кезінде DAZN, Queensberry және Top Rank тарапынан көңілінен шығатын ұсыныс алмағанын айтып, мәселенің промоутерлік саудада шешілетінін жеткізген. Сонымен қатар жақсы ұсыныс түссе, жекпе-жекке шығатынын, бірақ кездесудің өтпей қалуы да мүмкін екенін болжаған еді.

Ақырында оның болжамы шындыққа айналды. Queensberry саудада жеңгенімен, Шираз ұсынылған шарттармен Әлімханұлына қарсы рингке шығудан бас тартты.Шираздың чемпиондық белбеуден бас тартуы бокс әлемінде түрлі пікір туғызды. Пуэрто-Рико боксшысы Эдгар Берланга британдықтың шешімін қатаң сынға алды.

Берланганың пікірінше, Шираздың шешіміне қаржы мәселесі әсер еткен. Ол британдық боксшының коммерциялық мүмкіндігіне күмән келтіріп, Шираз өзінің ең ірі гонорарларының бірін дәл онымен өткен жекпе-жекте алғанын алға тартты.

Бұл пікірдің өзіндік контексті де бар. Шираз бұған дейін Берлангамен кездесіп, оны бесінші раундта нокаутқа түсірген. Ал Берланга 2024 жылы мексикалық жұлдыз Сауль «Канело» Альвареспен жұдырықтасып, төрешілер шешімімен жеңілген.

Сондықтан Берланганын мәлімдемесі бұрынғы қарсыласына бағытталған өткір сын ретінде қабылданды.

Британдық боксшының WBO белбеуінен бас тартуына қатысты негізгі сұрақтардың бірі – оның ендігі жоспары.

Шираз соңғы жылдары Турки Әл аш-Шейх ұйымдастыратын ірі бокс кештеріне тұрақты қатысып жүр. Оның соңғы төрт жекпе-жегі осы бағыттағы ірі жобалар аясында өткен. Сонымен қатар Шираздың Queensberry Promotions-пен келісімшарты бойынша бір жекпе-жегі қалғаны хабарланған.

Британдықтың есімі Сауль «Канело» Альвареспен ықтимал жекпе-жекке байланысты да аталып жүр. Сондықтан Әлімханұлы секілді қауіпті міндетті қарсыласпен кездесудің орнына Шираз коммерциялық тұрғыдан әлдеқайда ірі жекпе-жектерге назар аударуы мүмкін деген пікірлер айтылуда. Алайда оның келесі қарсыласы әзірге ресми түрде жарияланған жоқ.

Шираз чемпиондық атағын босатқанымен, бұл Жәнібек Әлімханұлы автоматты түрде WBO чемпионы болды дегенді білдірмейді.

Қазақстандық боксшы ұйымның ресми міндетті үміткері мәртебесін сақтап отыр. Енді WBO вакантты чемпиондық белбеу үшін жекпе-жек ұйымдастыруы керек.

Ұйым ережелеріне сәйкес, бос қалған әлем чемпионы атағы WBO санкциялаған жекпе-жекте сарапқа салынады. Чемпиондық комитет рейтингтегі ең жоғары қолжетімді үміткерлердің арасынан қарсыластарды анықтай алады. Әдетте тараптарға келіссөз жүргізу үшін белгілі бір мерзім беріледі. Келісімге қол жеткізілмесе, жекпе-жекті ұйымдастыру құқығы қайтадан промоутерлік саудаға шығарылуы мүмкін.

Демек, қазір негізгі мәселе – Жәнібектің чемпиондық белбеу үшін кіммен кездесетіні.

Бұл сұраққа 21 қыркүйекте WBO Чемпиондық комитетінің шешімінен кейін нақты жауап берілуі мүмкін.

Жәнібек Әлімханұлы бұған дейін орта салмақта өнер көрсетіп, WBO және IBF тұжырымдары бойынша әлем чемпионы болған.

2026 жылы қазақстандық боксшы орта салмақтағы WBO титулынан бас тартып, екінші орта салмаққа көтерілді. Тамыз айында WBO оны Шираздың чемпиондық белбеуіне міндетті үміткер ретінде ресми түрде бекітті.

Осыдан кейін Әлімханұлының басты мақсаты жаңа салмақ дәрежесінде де әлем чемпионы атану болды.

Оның кәсіби бокстағы көрсеткіші – 17 жеңіс, 12 нокаут. Жәнібек кәсіпқой рингте әлі жеңілген жоқ.

Шираздың да жеңілісі жоқ. Британдықтың еншісінде 24 жеңіс пен бір тең нәтиже бар, 19 қарсыласын мерзімінен бұрын жеңген.

Сондықтан бастапқыда Шираз – Әлімханұлы кездесуі екінші орта салмақтағы екі жеңілмеген боксшының маңызды айқасы ретінде қарастырылған еді.

Жәнібекке қатысты сын да бар

Сонымен бірге Әлімханұлының қазіргі титулдық мүмкіндігіне қатысты халықаралық бокс ортасында сын айтылып жүр.

Америкалық Tru School Sports YouTube-арнасының авторы Брендан Тейлор Шираз – Әлімханұлы жекпе-жегінің өтпейтініне өкінбейтінін мәлімдеді. Ол Жәнібектің допингке байланысты бұрынғы жағдайын еске алып, қазақстандық боксшының қысқартылған дисквалификациядан кейін бірден титулдық мүмкіндік алуын сынға алды.

Кейбір бокс сарапшылары мен жанкүйерлер WBO-ның Әлімханұлын міндетті үміткер ретінде бекітуіне қатысты да сұрақ қойған. Атап айтқанда, рейтингтегі басқа үміткерлердің жағдайы талқыланды.

Соған қарамастан, WBO-ның қазіргі ресми шешімі бойынша Әлімханұлы екінші орта салмақтағы чемпиондық белбеуге міндетті үміткер мәртебесінде қалып отыр.

21 қыркүйектегі шешім маңызды болмақ

Шираздың титулдан бас тартуынан кейін екінші орта салмақтағы WBO белбеуі вакантты қалды. Енді назар толығымен ұйымның Чемпиондық комитетіне ауып отыр.

21 қыркүйекте WBO Жәнібек Әлімханұлының келесі қарсыласын бірден анықтауы немесе вакантты титул үшін жекпе-жекті ұйымдастыру тәртібін жариялауы мүмкін.

Қалай болғанда да, Шираздың шешімі Жәнібектің чемпиондық жоспарларын тоқтатпайды. Керісінше, қазақстандық боксшы енді бұрынғы чемпионның өзімен емес, WBO бекітетін басқа үміткермен бос қалған әлем чемпиондық белбеуі үшін жұдырықтасуы ықтимал.

Осылайша бірнеше ай бойы талқыланған Шираз – Әлімханұлы жекпе-жегінің тарихы күтпеген жерден аяқталды: британдық чемпион міндетті қарсыласымен кездесудің орнына белбеуді босатты, ал Жәнібек Әлімханұлы екінші орта салмақтағы WBO чемпионы атану мүмкіндігін сақтап қалды.

Ендігі басты сұрақ – WBO қазақстандық боксшыға қарсы кімді шығарады. Оның жауабы 21 қыркүйекте белгілі болуы тиіс.