Шимпанзелердің сырын ашқан Джейн Гудолл өмірден озды

Шимпанзелердің мінез-құлқын зерттеумен әлемге танылып, ғылымға төңкеріс жасаған тұлға ретінде тарихта қалған британдық приматолог Джейн Гудолл 91 жасында дүниеден өтті, деп хабарлайды El.kz интернет порталы. 

Джейн Гудоллдың ғылыми жолы 1960 жылы Танзаниядағы Гомбе ұлттық паркінде басталды. Сол жерде ол шимпанзелердің құрал қолданатынын, әлеуметтік байланыстар мен эмоцияға ие екенін алғаш дәлелдеді. Бұл жаңалық ғылымдағы адам мен жануар арасындағы шекараға деген көзқарасты түбегейлі өзгертті.

1977 жылы ол «Jane Goodall Institute» атты ұйым құрды. Кейіннен жастарға экологиялық тәрбие беруге бағытталған «Roots & Shoots» бағдарламасын іске қосты. Осы арқылы ол табиғатты қорғау ісіне мыңдаған жастарды тартты.

Ғалымның еңбегі тек зерттеумен шектелмеді: ол өмірінің соңына дейін қоршаған ортаны қорғау, жануарларға жанашырлық таныту, экологиялық дағдарысқа қарсы әрекет ету бағытында белсенді болды. Оның идеялары әлемде табиғатқа деген жауапкершілікті күшейтті.

Джейн Гудоллдың өмірі — ғылымға, адамзатқа және табиғатқа адал қызмет етудің айғағы. Оның мұрасы болашақ ұрпаққа қоршаған ортаны құрметтеудің және онымен үйлесімде өмір сүрудің мәнін еске салумен қала береді.