Шаш түсуінен қорғайтын препарат: оның ерекшелігі неде?

Ғалымдар шаш түсуіне қарсы жаңа дәрі әзірлеуде үлкен жетістікке қол жеткізді. Мамандардың айтуынша, бұл препарат ерлерге де, әйелдерге де қолданылуы мүмкін.

Дәрі клиникалық сынақтардың негізгі кезеңдерінің бірінен сәтті өтіп, қатысушылардың басым бөлігінде шаш өсуінің айтарлықтай жақсарғанын көрсетті.

Шаш түсуі – әлемдегі ең кең таралған мәселелердің бірі. Миллиондаған адам осы проблемаға тап болады. Мамандар дерегінше, 65 жасқа қарай ер адамдардың басым бөлігінде, сондай-ақ әйелдердің үштен бірінен астамында шаш сиреуі байқалады. Соған қарамастан, шынымен тиімді емдеу әдістерінің таңдауы әлі де шектеулі.

Америкалық Veradermics биофармацевтикалық компаниясы VDPHL01 деп аталатын жаңа препарат әзірлеп жатыр. Оның негізінде миноксидил бар. Бұл – шаш өсуін ынталандыру үшін бірнеше ондаған жылдан бері қолданылып келе жатқан белгілі зат. Алайда мұндай дәрілердің көбі бас терісіне жағылатын болса, жаңа препарат таблетка түрінде ұсынылады.

Неге әдеттегі миноксидил бәріне бірдей қолайлы емес?

Миноксидил бастапқыда таздануға қарсы емес, жоғары қан қысымын емдеу үшін жасалған. 1970-жылдары ол қан тамырларын кеңейтіп, қысымды төмендететін дәрі ретінде қолданылды. Кейін бұл заттың шаш өсуіне де ықпал ететіні анықталып, оның негізінде сыртқа қолданылатын танымал құралдар пайда болды.

Алайда миноксидилді ішке қабылдау ұзақ уақыт бойы қауіпсіз тәсіл саналмады. Өйткені препарат ағзаға тым тез түскен жағдайда жүрек-қан тамыр жүйесіне әсер етіп, жағымсыз жанама әсерлер туындатуы мүмкін еді.

Жаңа препаратты әзірлеушілер бұл мәселені белсенді затты баяу босату технологиясы арқылы шешкен. Соның арқасында дәрі қанға біртіндеп таралып, шаш фолликулдарына тұрақты әсер етеді. Сонымен қатар жүрекке түсетін салмақты азайтуға мүмкіндік береді.

Үміт бар

Зерттеуге 500-ден астам адам қатысқан. Алты айлық емнен кейін қатысушылардың 85 пайыздан астамы шашының жағдайы айтарлықтай жақсарғанын айтқан.

Мұны объективті өлшемдер де растады. Препарат қабылдаған адамдарда шаш өсуі плацебо қабылдаған қатысушылармен салыстырғанда шамамен төрт есе жоғары болған.

Сонымен қатар клиникалық сынақтар дәрінің жақсы көтерілетінін және қауіпсіздікке қатысты елеулі мәселе байқалмағанын көрсетті.

Қосымша зерттеулер

Дегенмен препаратты әзірлеу жұмысы әлі толық аяқталған жоқ. Компания ер адамдарға арналған қосымша зерттеулерге дайындалып жатыр. Сонымен қатар әйелдер арасындағы сынақтарға қатысатын еріктілерді қабылдау басталған.

Егер келесі кезеңдерде де препараттың тиімділігі дәлелденсе, VDPHL01 әйелдердегі таздануға қарсы ресми мақұлданған алғашқы таблетка түріндегі дәрілердің бірі болуы мүмкін. Сондай-ақ ол ерлерге арналған осы бағыттағы алғашқы мамандандырылған пероральды препараттардың қатарына енуі ықтимал.