Үш елдің азаматтары Қазақстанда визасыз жүре алады

2022 жылдың 8 шілдесінен бастап Қазақстан Үндістан, Иран және Қытай азаматтары үшін біржақты тәртіпте визасыз режим ашады. Сондай-ақ Үндістан мен Қытай үшін 72 сағаттық визасыз арнайы транзиттік режим өз жұмысын тоқтатты, деп хабарлайды El.kz Көші-қон қызметі комитетіне сілтеме жасап.

Визасыз режим шарттарына сәйкес, Үндістан, Иран және Қытай азаматтары Қазақстанға шекарадан өткен сәттен бастап 14 күнтізбелік күнге дейін визасыз кіріп, біздің елде жүре алады. Сондай-ақ, іскерлік, жеке және туристік мақсатта саяхаттауға рұқсат етіледі.

Министрлік визасыз режимде Қазақстанда жүрудің жалпы мерзімі әрбір 180 күндік кезеңде 42 күнтізбелік күннен аспауы тиіс екенін атап өтті. Осы шартты бұзған жағдайда шетелдіктер төмендегідей әкімшілік жауапкершілікке тартылады:

• 10-нан 25 АЕК-ке дейін айыппұл;
• 15 тәулікке дейін қамауға алу;
• Қазақстан Республикасынан шығару;
• 5 жылға дейін ҚазақстанРеспубликасына келуге тыйым салу (сот шешімімен).