"Сейітқасымов оқулары-2023" атты Халықаралық ғылыми-практикалық конференция өтті

Іс-шара 4 жыл бойы өткізіліп келеді, деп хабарлайды El.kz ақпарат агенттігі.

Esil University-де ҚР ҰҒА Академигі, экономика ғылымдарының докторы, профессор, Қазақ экономика, қаржы және халықаралық сауда университетінің (Қазіргі Esil University) бірінші ректоры Ғабдығапар Сағитұлы Сейітқасымовтың ғылыми мұрасын дәріптеуге арналған "Сейітқасымов оқулары-2023" тақырыбында жыл сайынғы Халықаралық ғылыми-практикалық конференция өтті.

Конференцияға 150-ден астам адам қатысты, олардың ішінде Ресей және Беларусь профессорлары, көрнекті қоғам қайраткерлері, Қазақстанның жоғары оқу орындарының бірінші басшылары, сондай-ақ ҚР Ұлттық банкінің бірінші төрағасы Ғалым Байназарұлы Байназаров, э.ғ.д., Л.Гумилев атындағы ЕҰУ профессоры Загира Дүйсенбайқызы Ысқақова.

Пленарлық отырыста қатысушылар Қазақстанда тиімді қаржы-несие саясатын жүргізудің өзекті мәселелерін, сондай-ақ қаржы және банк жүйесін қоса алғанда, экономика секторларын одан әрі дамыту бағыттарын талқылады. Конференция барысында өзекті тақырыптар бойынша барлығы 156 баяндама тыңдалды, оның ішінде 67 – қазақстандық жоғары оқу орындары, 23 - таяу шетелдегі жоғары оқу орындары.

Іс-шараға қатысушылар мен қонақтар ғылым және жоғары білім саласындағы ғалым мен қайраткерді еске алып, еңбегіне ризашылықтарын білдірді, сондай-ақ, өздерінің жылы естеліктерімен бөлісті.

Айта кетейік, "Сейітқасымов оқулары" Халықаралық ғылыми-практикалық конференциясы бірінші рет емес, 4 жыл бойы өткізіліп келеді.