Семейде бір топ оқушы жас баланы аяусыз соққыға жыққан

Семейде мектеп жасындағы бір топ оқушы жас баланы соққыға жыққан. Бұл сәттің видеосын @kriminal_kazakhstan Telegram-арнасы жариялады, деп хабарлайды El.kz ақпарат агенттігі.

Ондағы мәліметке сүйенсек, оқиға Семей қаласының 343-кварталында болған. №9 мектептің оқушысын төрт жасөспірім соққыға жыққан және мүшеқапты үрлеуді бұйырады. Ұрып-соққандардың арасында қыздар да болған көрінеді. 

Аталған фактіге қатысты облыстық Полиция департаменті пікір білдірді. Ведомство мәліметінше, қылмыстық іс қозғалды. Оқиға қатысушылары жедел анықталып, ата-аналарымен бірге полиция бөліміне жеткізілген.

Жасөспірімдер полиция есебіне қойылады. Олардың іс-әрекетін кәмелетке толмағандардың құқықтарын қорғау жөніндегі облыстық комиссия қарайды. Ата-аналарға балаларын дұрыс тәрбиелемегені үшін қатаң жауапкершілік жүктеледі. Тергеу барысы Абай облыстық Полиция департаменті басшылығының ерекше бақылауында,-деп атап өтті полициядан.