Щучинскіде биатлон бапкерлеріне арналған IBU курсы өтті

Щучинскідегі Олимпиадаға даярлау орталығында қазақстандық 20 жас жаттықтырушыға және Қырғызстан мен Грузия мамандарына арналған Халықаралық биатлоншылар одағының (IBU) біліктілік курсы өтті, деп хабарлайды El.kz ақпарат агенттігі.

Қазақстан биатлоншылар одағының баспасөз қызметінің мәліметінше, аталған шара ҚР Ұлттық олимпиада комитетінің қолдауымен ұйымдастырылды. 

Курстың алғашқы күні Халықаралық федерацияның биатлонды дамыту бөлімінің жетекшісі Дагмар Герасимук дәріс оқыды. Кейін биатлоннан Италия және Швейцария құрамаларының бұрынғы бапкері Армин Касслаттер білгенімен бөлісті. Теориялық білімнен соң қатысушылар курстың практикалық бөлігіне өтті.

Семинардың екінші күнінде жаттықтырушылар атудың базалық техникасы туралы дәріс тыңдады. Мұнда қатысушы мамандар ату кезінде дұрыс демалу, мылтықты тұрақтандыру  және нысана көздеуге қатысты ойларымен бөлісті. Семинардың практикалық бөлігінде қатысушылар жатып және тұрып ату кезінде жіберілетін қателіктерді талқылады. 

Семинардың үшінші күнінде шетелдік мамандар қатарына Норвегия, Австрия, Швейцария және АҚШ құрамаларының бұрынғы бапкері Тронд Нистад қосылды. Ол кезінде әйгілі биатлоншы, Олимпиаданың сегіз, әлемнің жиырма дүркін чемпионы, әлем кубогінің алты дүркін иегері Уле-Эйнар Бьёрндаленді жаттықтырған. 

Төртінші күні үш түрлі локацияда сабақ өткізілді.  Теориялық дәрісті Назарбаев университетінің профессоры Дмитрий Видерман жүргізді. Ал практикалық бөлігі жаттығу залында өтті.