Қырғызстандағы сайлауға Қазақстанда дауыс беруге болады

Шетелде тұратын қырғыз азаматтары үшін Қырғызстан парламентінің мерзімінен бұрын сайлауында дауыс беруге мүмкіндік туды. Әлемнің 34 елінде жалпы 100 сайлау учаскесі ұйымдастырылды, деп хабарлайды, деп хабарлайды El.kz интернет порталы.

5 қараша күні Қырғыз Республикасының Сайлау және референдумдар жөніндегі орталық комиссиясы Алматы, Тараз және Шымкент қалаларында үш қосымша сайлау учаскесін ашу туралы шешім қабылдады.

Еске салсақ, Қырғызстан Президентінің 30 қыркүйектегі жарлығымен Жогорку Кенеш депутаттарының мерзімінен бұрын сайлауы 2025 жылдың 30 қарашасында, жексенбі күні өтеді деп бекітілген.

Сайлау бойынша барлығы 589 кандидат ұсынылған, олардың 365-еуі ер, 224-еуі әйел. Кандидаттарды тіркеу 9 қарашаға дейін жалғасады, ал үгіт-насихат науқаны 10 қарашадан басталады.

Сонымен қатар, Қырғызстанның Сайлау және референдумдар жөніндегі орталық комиссиясы мерзімінен бұрын парламент сайлауына 127 халықаралық бақылаушыны аккредиттеген.