ҚПЛ 24-туры: «Астана» жеңіске жетті, «Ертіс» соңғы орыннан көтерілді

Қазақстан Премьер-лигасының 24-туры аясында жексенбі күні үш матч өтті. «Астана» сырт алаңда «Атырауды» жеңсе, Павлодардың «Ертісі» «Ақтөбеден» ұтылып жатып, матч тағдырын өз пайдасына шешті. Ал «Каспий» өз алаңында «Тоболды» минималды есеппен жеңді.

«Астана» үшінші орынға көтерілді

Түркістанда өткен «Атырау» – «Астана» кездесуінде бес гол соғылды. Елордалық команда бірінші таймда екі доп айырмасымен алға шықты. 13-минутта Бауыржан Исламхан есеп ашса, 42-минутта Станислав Басманов есепті 2:0-ге жеткізді.

Үзілістен кейін алаң иелері жауап голын соқты. 47-минутта Джордже Пантелич «Астананың» қақпасына доп енгізіп, айырманы қысқартты. Дегенмен 66-минутта Марин Томасов қонақтардың басымдығын қайта қалпына келтірді.

Кездесудің негізгі уақытына қосылған бесінші минутта Энрике Девенс «Атыраудың» екінші голын соқты. Алайда соңғы ысқырыққа дейін есеп өзгерген жоқ – 2:3. Бұл ойында Бауыржан Исламхан гол соғумен қатар, екі нәтижелі пас берді.

Осы жеңістен кейін «Астана» 42 ұпай жинап, турнир кестесінде үшінші орынға қайта көтерілді. Елордалық клуб төртінші тұрған «Оқжетпестен» үш ұпайға алда. Команда көш бастап тұрған «Ордабасы» мен «Қайратты» қуып келеді.

«Ертіс» екінші таймда ойынды өзгертті

Павлодарда жергілікті «Ертіс» «Ақтөбені» қабылдады. Бірінші таймның 37-минутында қонақтар сапынан Артур Шушеначев есеп ашып, «Ақтөбені» алға шығарды – 0:1.

Алайда үзілістен кейін павлодарлықтар небәрі үш минуттың ішінде есепті өзгертіп жіберді. 50-минутта Леонардо Калил таразы басын теңестірсе, 53-минутта Рамазан Каримов «Ертіске» жеңіс голын соқты. Осылайша, «Ертіс» 2:1 есебімен жеңіске жетті.

Бұл нәтиже павлодарлықтар үшін төменгі дивизионға түсіп қалмау жолындағы күресте аса маңызды болды. «Ертіс» 20 ұпай жинап, турнир кестесіндегі соңғы орыннан 13-сатыға көтерілді.

«Атырау» мен «Қайсардың» да еншісінде 20 ұпай бар. Ал төменгі орындарда тұрған «Жетісу» мен «Алтай» 19 ұпайдан жинаған. «Ақтөбе» 35 ұпаймен бесінші орында қалды.

«Каспий» бір голмен жеңді

Ақтауда «Каспий» мен Қостанайдың «Тоболы» кездесті. Бірінші таймда командалар есеп аша алмады.

Матчтағы жалғыз гол 70-минутта соғылды. Конголық шабуылшы Ноа Ндомбази қарсы шабуылды сәтті аяқтап, «Каспийге» жеңіс сыйлады – 1:0.

Осы жеңістен кейін «Каспий» 26 ұпаймен оныншы орында қалды. «Тоболдың» еншісінде 28 ұпай бар, Қостанай клубы турнир кестесінде тоғызыншы орында тұр.

24-турдың соңғы матчы – Семейде

Қазақстан Премьер-лигасының 24-туры 31 тамызда «Елімай» – «Қайрат» матчымен аяқталады. Кездесу Семейде өтеді.

Алматылық «Қайрат» қазіргі таңда 48 ұпай жинаған. Егер қонақтар жеңіске жетсе, көш басындағы «Ордабасыдан» қалып тұрған айырмасын төрт ұпайға дейін қысқартады. Ал шымкенттік клуб 23 ойыннан кейін 55 ұпаймен турнир кестесінің көшін бастап келеді.

Ал былтыр ҚПЛ-да үздік болып, биыл Англияға доп тебуге аттанған Дастан Сәтпаев «Бернлидің» үздігі атанды.