Қорғаншылық және қамқоршылық органы қызметкерлерінің саны 47%-ға артты

Оқу-ағарту министрлігі Балалардың құқықтарын қорғау комитетінің мәліметінше, жыл басынан бері қамқоршылық органдары қызметкерлерінің штат саны 47%-ға артты. Бұл жетім және ата-анасының қамқорлығынсыз қалған балалардың өмір сүру жағдайларын жүйелі тексеруге мүмкіндік беріп отыр, деп хабарлайды El.kz ақпарат агенттігі. 

Комитет төрағасы Насымжан Оспанованың айтуынша, қорғаншылық және қамқоршылық органдары қызметкерлерінің санын арттыру балалардың құқықтарын қорғау жүйесінің сапасын жақсартуға ықпал етеді.

Қызметкерлердің кәсібилігі мен өз жұмысына жауапкершілікпен қарауының арқасында біз әр баланың құқығының қорғалуына және өзін қауіпсіз сезінуіне жағдай жасаймыз. Бұл балалардың өмір сүру сапасын жақсартып қана қоймай, олардың құқықтарын қорғаудың бүкіл жүйесін нығайта отырып, болашағын жарқын етеді, - деді Насымжан Оспанова.

Ведомство дерегінше, жыл басынан бері патронаттық тәрбиедегі 17 660 жетім баланың өмір сүру жағдайы тексерілген. Тұрмыстық жағдайына, балалардың денсаулығына, физикалық және эмоционалдық дамуына, сондай-ақ отбасылық қарым-қатынастарға ерекше назар аударылған. Тексеру қорытындысы бойынша қамқоршылар мен қорғаншылардың қызметін одан әрі бақылау бойынша ұсынымдар берілген. Бұл шаралар қорғаншылық пен қамқоршылық жүйесін әрі қарай жетілдіруге, қорғау мен қолдауға мұқтаж балалардың балалық шағы мен болашағын лайықты қамтамасыз етуге ықпал етеді.