Қазақстандық шахматшы Алуа Нұрман әлемдік рейтингте үздік үштікке енді

Қазақстандық шахматшы, халықаралық шебер (IM) Алуа Нұрман Халықаралық шахмат федерациясының (FIDE) жаңартылған рейтингінде 20 жасқа дейінгі қыздар арасында әлемнің үздік үш шахматшысының қатарына енді. 19 жастағы спортшы 2442 рейтингтік ұпай жинап, екінші орында тұрған шахматшыдан небәрі бір ұпайға ғана қалып келеді.

Бұл нәтиже Алуаның әлемдік деңгейдегі ең мықты жас шахматшылардың бірі екенін тағы бір мәрте дәлелдеп отыр. Соңғы жылдары ол халықаралық турнирлерде тұрақты жоғары нәтиже көрсетіп, рейтингін үздіксіз жақсартып келеді.

Алматыда дүниеге келген жас дарын

Алуа Нұрман 2007 жылғы 25 сәуірде Алматы қаласында дүниеге келген. Ол жасөспірім кезінен-ақ шахматтан ерекше қабілетін көрсетіп, халықаралық жарыстарда Қазақстанның намысын абыроймен қорғап келеді. Бүгінде Алуа халықаралық шебер (IM) атағына ие. Бұл атаққа қол жеткізген санаулы қазақстандық шахматшы қыздардың бірі саналады. Сонымен қатар ол әйелдер арасындағы халықаралық гроссмейстер (WGM) атағының иегері.

Халықаралық аренадағы жарқын жетістіктер

Алуа Нұрманның спорттық жолында ірі жеңістер аз емес. 2018 жылы мектеп оқушылары арасындағы әлем чемпионатында алтын медаль жеңіп алды. Кейін жастар арасындағы Азия чемпионатында бли

Қазақстан шахматының жаңа буыны

цтен чемпион атанып, классикалық шахматтан қола жүлдеге ие болды. 2025 жылы ол блиц шахматынан Азия чемпионы атанды. Ал Гонконгта өткен командалық әлем чемпионатында Қазақстан құрамасы сапында блицтен алтын, рапидтен күміс медаль жеңіп алып, халықаралық деңгейдегі жоғары шеберлігін тағы бір мәрте дәлелдеді.

Соңғы жылдары Қазақстан шахматы әлемдік аренада қарқынды дамып келеді. Жас шахматшылар халықаралық турнирлерде тұрақты түрде жүлде алып, әлемдік рейтингтердегі позицияларын жақсартып келеді.

Алуа Нұрманның 20 жасқа дейінгі қыздар арасындағы әлемдік рейтингтің үздік үштігіне енуі – қазақстандық шахматтың жаңа белеске көтерілгенінің айқын көрінісі. Сарапшылардың пікірінше, оның алдағы уақытта әлемдік рейтингтің екінші, тіпті бірінші сатысына көтерілуіне толық мүмкіндігі бар.