Қазақстанда техбайқау тәртібі өзгереді: жүргізушілер 19 қазанға дейін нені білуі керек

Қазақстанда автокөліктер мен тіркемелерді міндетті техникалық байқаудан өткізу тәртібі жаңартылады. Жаңа талаптар техникалық байқау орталықтарының жұмысын цифрлық бақылауды күшейтіп, тексеру нәтижелерін тіркеу мен диагностикалық карталарды рәсімдеуге қатысты бірқатар өзгеріс енгізеді.

Техбайқау қай жерде және қашан өткенін жүйе тіркейді

Жаңа ережелер 19 қазаннан бастап күшіне енеді. Осы уақытқа дейін техникалық байқау орталықтары жаңартылған жүйеге қосылып, қажетті құжаттары мен жабдықтарын талапқа сәйкестендіруі тиіс.

Өзгерістердің негізгі бағыттарының бірі – міндетті техникалық байқаудың бірыңғай цифрлық жүйесін жетілдіру.

Жүйеге көліктің өзі, оның иесі, диагностика нәтижелері және берілген диагностикалық карта туралы толық ақпарат енгізіледі. Сонымен қатар техникалық байқаудың нақты қай жерде және қашан жүргізілгені де тіркеледі.

Ол үшін стационарлық және мобильді техникалық байқау желілері навигациялық жүйелерді пайдалануы керек. Құрылғылар жұмыс барысында станцияның орналасқан жері туралы ақпаратты цифрлық жүйеге жібереді.

Бұл жүргізуші үшін техникалық байқаудан өткенін растайтын құжатпен қатар, тексерудің нақты жерде жүргізілгені туралы электронды дерек те сақталатынын білдіреді.

Көлікті тексеруге қанша уақыт беріледі?

Жаңа талаптар бойынша көліктің санатына қарай техникалық байқауға жұмсалатын уақытқа да норматив белгіленген.

• Жеңіл автомобильдерге (M-1) – 20 минутқа дейін;
• Мотоциклдер мен жеңіл тіркемелерге (L және O-1 санаттары) – 15 минутқа дейін;
• Автобустарға, жүк көліктері мен ауыр тіркемелерге (M-2, M-3, N-1–3, O-2–4) – 30 минутқа дейін.

Яғни техникалық байқау орталығы көлікті тексеруді белгіленген уақыт нормативінен асырмай өткізуі тиіс.

Техбайқау нәтижелері жүйеге автоматты түрде түседі

Стационарлық техникалық байқау желілері диагностика нәтижелерін цифрлық жүйеге күн сайын және нақты уақыт режимінде жіберуге міндетті. Ал қаладан тыс жерлерге шығатын мобильді желілер ақпаратты екі күнтізбелік күнде бір рет ұсынады.

Жүйеде тек тексерудің қорытындысы ғана емес, оның нақты уақыты мен орны да көрсетіледі. Бұл үшін техникалық байқау орталықтарында навигациялық жүйе орнатылуы қажет.

Жалған диагностикалық картаға тосқауыл қойылады

Жаңа талаптар техникалық байқаудың нәтижелерін бұрмалауға жол бермеуге бағытталған. Егер көлік туралы мәліметтер расталмаса, бірыңғай цифрлық жүйе диагностикалық картаны автоматты түрде қалыптастырудан бас тартады.

Сондай-ақ жүйе жалған диагностикалық картаның белгілерін анықтай алады. Егер техникалық байқау орталығының бағдарламасы немесе оған қосылған құрылғылар бұрмаланған ақпарат жіберсе, бірыңғай жүйе операторы мұндай бағдарламадан дерек қабылдауды бұғаттай алады.

Техникалық байқау орталықтары пайдаланатын бағдарламалық қамтамасыз ету де бақылауда болады. Оның белгіленген талаптарға сәйкестігі жылына екі рет тексеріледі.

Техникалық жабдық та цифрлық бақылауда болады

Техникалық байқау орталығы жүйеге қосылу үшін қажетті жабдықтың бар екенін және оның құжаттарын растауы тиіс. Міндетті құрылғылардың қатарында:

• тежегіш стенді;
• люфтомер;
• газ талдағыш;
• түтін өлшегіш;
• фара жарығын тексеретін құрылғы бар.

Цифрлық жүйеге әр жабдықтың бірегей идентификаторы енгізіледі. Осы арқылы диагностиканың нәтижесін нақты қандай құрылғының көмегімен жүргізілгенін анықтауға болады.

Бұдан бөлек, өлшеу құралдарының тексеруден өткен-өтпегені техникалық реттеу жүйесі арқылы бақыланады.

Қандай жағдайларда полицияға хабар беріледі?

Жаңа тәртіп бойынша техникалық байқау операторы бірқатар заң бұзушылықтар анықталған жағдайда ішкі істер органдарына дереу хабарлауға міндетті. Бұл, атап айтқанда, көліктің сәйкестендіру деректерінде сәйкессіздік болған кезде жасалады.

Мысалы, мемлекеттік нөмір көлік құралын тіркеу туралы куәліктегі мәліметке сәйкес келмесе немесе шасси мен кузов нөмірлерінде айырмашылық анықталса, ақпарат полицияға жіберіледі. Сондай-ақ көлік конструкциясына заңсыз өзгеріс енгізілгені анықталған жағдайда да тиісті органдар хабардар етіледі.

Диагностикалық картаны жоғалтып алсаңыз не істеу керек?

Диагностикалық карта жоғалған немесе бүлінген жағдайда техникалық байқаудан қайта өтудің қажеті жоқ. Көлік иесі картаны бұрын берген операторға жүгініп, оның телнұсқасын ала алады. Оператор дубликатты 15 минут ішінде беруге тиіс.

Бұл ретте жаңа құжаттың жарамдылық мерзімі өзгермейді. Оператор бұрын жүргізілген техникалық байқау туралы бірыңғай цифрлық жүйеде сақталған ақпаратты пайдаланады.

Талаптарды бұзған орталықтың жұмысы тоқтатылуы мүмкін

Техникалық байқау орталығы белгіленген талаптарды орындамаған жағдайда бірыңғай цифрлық жүйе оның қызмет көрсету мүмкіндігін уақытша тоқтата алады.

Мұндай шараға қажетті ақпаратты ұсынбау, орталықтың мекенжайы өзгергені туралы уақытында хабарламау немесе диагностикалық картаны бекітілген нысанға сәйкес рәсімдемеу себеп болуы мүмкін.

Талап бұзушылық жойылғаннан кейін оператор оны растайтын құжаттарды ұсынуы қажет. Содан соң жүйе талаптардың орындалғанын растаған жағдайда орталықтың жұмысы қайта қалпына келтіріледі.

Сонымен қатар техникалық байқау нәтижелеріне тұрақты мониторинг жүргізіледі. Бұл үшін көлік саласы мен құқық қорғау органдары өкілдерінен тұратын жұмыс тобы аптасына кемінде екі рет құрылады.

Жүргізушілер үшін бұл нені білдіреді?

Жаңа тәртіп ең алдымен техникалық байқаудың ашықтығын арттыруға бағытталған. Енді тексерудің уақыты, орны, нәтижесі және пайдаланылған жабдық туралы мәліметтер цифрлық жүйеде тіркеледі.

Ал техникалық байқау орталықтары үшін талаптар күшейеді: олар қажетті жабдықпен қамтамасыз етіліп, ақпаратты уақытылы беріп, цифрлық жүйемен жұмыс істеуге тиіс.

Жаңа талаптар 19 қазаннан бастап күшіне енеді. Осы күнге дейін техникалық байқау орталықтары жаңартылған жүйеге қосылып, өз қызметін жаңа талаптарға сәйкестендіруі қажет.