Қазақстан азаматтарын Израиль мен Ираннан эвакуациялау жалғасуда

Еліміздің сыртқы істер министрлігі үйлестірілген эвакуациялық іс-шаралар шеңберінде Израиль мен Ираннан 144 қазақстандық сыртқа шығарды, деп хабарлайды El.kz интернет порталы. 

Оның ішінде Израильден 66 отандасты (Мысыр аумағы арқылы), Ираннан 78 азаматты (Армения арқылы – 73, Әзербайжан – 2, Түрікменстан – 3) эвакуациялады. Иран және Израильдегі қазақстандық дипломаттар өз азаматтарына қажетті консулдық-құқықтық көмекті қамтамасыз ету бойынша жұмысты жалғастырып жатыр. 

СІМ Израиль, Мысыр және Армения билігіне өз ризашылығын білдіреді, сондай-ақ қазақстандықтарды эвакуациялауға қолдау көрсетіп жүрген ирандық, әзербайжан және түрікмен әріптестеріне қайта алғыс білдірген. Бірлескен күш-жігердің арқасында азаматтарымыз үйлеріне аман-есен оралуға мүмкіндік алып отыр.