Қазақстан әлемнің үздік бес күрес державасының қатарына енді: не өзгерді?

Әзербайжанның Баку қаласында өткен 17 жасқа дейінгі спортшылар арасындағы әлем чемпионаты Қазақстан құрамасы үшін тарихи нәтижемен аяқталды. Жас балуандар екі алтын, екі күміс және төрт қола медаль жеңіп алып қана қоймай, үш күрес түрі бойынша жалпыкомандалық есепте 225 ұпай жинап, әлемнің үздік бес құрамасының қатарына енді.

Жалпы есепте Ресей 305 ұпаймен көш бастады. Екінші орынға АҚШ (294 ұпай), үшінші орынға Үндістан (250 ұпай), ал төртінші орынға Иран (231 ұпай) жайғасты. Қазақстан 225 ұпаймен бесінші орынды иеленіп, Өзбекстан, Украина, Жапония, Әзербайжан және Түркия сияқты мықты құрамаларды артта қалдырды.

Бұл нәтиже Қазақстанды Азиядағы үздік үш құраманың қатарына қосты. Құрлық бойынша біздің балуандар Үндістан мен Ираннан кейін үшінші орынға ие болса, Орталық Азия елдері арасында көш бастады.

Қазақстан қоржынына 8 медаль түсті

Баку бозкілемінде қазақстандық балуандар екі алтын, екі күміс және төрт қола медаль жеңіп алды. Әлем чемпионы атанғандар:

• Дияр Аманәлі (грек-рим күресі, 55 келі);
• Бақдәулет Ағабек (еркін күрес, 48 келі).

Күміс жүлде иеленгендер:

• Әли Алмас (грек-рим күресі, 48 келі);
• Айша Әбдімәлік (әйелдер күресі, 65 келі).

Қола жүлдегерлер:

• Әлинұр Төлеуғали (грек-рим күресі, 71 келі);
• Інжу Баққожа (әйелдер күресі, 46 келі);
• Мардан Орынбасар (еркін күрес, 60 келі);
• Әділет Рысбай (еркін күрес, 71 келі).

Дияр Аманәлі драмалық финалда жеңіске жетті

Қазақстан құрамасының алғашқы алтын медалін грек-рим күресінен 55 келіге дейінгі салмақта өнер көрсеткен Дияр Аманәлі жеңіп алды.

Финалда ол Венгрия балуаны Кеве Вазул Ковачпен белдесті. Тартысты өткен кездесу 1:1 есебімен аяқталғанымен, алғашқы нәтижелі әдісті Дияр жасағандықтан, жеңіс қосымша көрсеткіш бойынша қазақстандыққа берілді.

Финалға дейін Дияр Грекия, Ресей, Грузия және Болгария балуандарын сенімді түрде жеңіп шықты.

Бақдәулет төрт жылдық үзілісті тоқтатты

Қазақстанның екінші алтын медалін еркін күрес шебері Бақдәулет Ағабек иеленді. 48 келіге дейінгі салмақта бақ сынаған жас балуан бес белдесудің барлығында жеңіске жетті. Финалда Үндістан өкілі Аарьянды 10:0 есебімен мерзімінен бұрын ұтып, әлем чемпионы атанды.

Бұл жеңістің маңызы ерекше. Қазақстан еркін күрестен U17 әлем чемпионатында 2022 жылдан бері алтын медаль жеңе алмай келген еді. Бақдәулет осы төрт жылдық үзіліске нүкте қойды.

Былтырғыдан нәтиже жақсарды

2025 жылы Афинада өткен әлем чемпионатында Қазақстан құрамасы бір алтын, екі күміс және жеті қола медаль жеңіп алған болатын.

Ал Бакуде әлем чемпиондарының саны екіге жетті. Финалға шыққан спортшылар қатары да көбейіп, еркін күресте қола медальдардың орнына алтын жүлде алынды.

Әйелдер күресінде екі жүлде сақталса, олардың бірі күміске айналды. Ал грек-рим құрамасы алтын, күміс және қола медаль жеңіп алып, барлық жүлде түрінен нәтиже көрсетті.

Мамандардың пікірінше, бұл нәтиже жасөспірімдер құрамасын ұзақ мерзімді әрі жүйелі даярлау жұмысының жемісі. Қазақстан күрес федерациясының төрағасы Еркін Оқасов ұлттық құраманы әлем чемпионатына шығарып салу кезінде жас спортшылардың әлеуетін дамыту федерация жұмысының басты басымдықтарының бірі екенін атап өткен болатын.

Оның айтуынша, әлем чемпионатына дайындық барысында оқу-жаттығу жиындары, медициналық қолдау және спортшыларға қажетті жағдай жасауға ерекше көңіл бөлінген.

Бакудегі әлем чемпионаты Қазақстанның тек жекелеген салмақтарда ғана емес, үш күрес түрі бойынша да әлемдік деңгейде бәсекеге қабілетті екенін көрсетті. Жалпыкомандалық есептегі бесінші орын, екі алтын медаль және төрт финал – қазақстандық күрестің жаңа буынының әлеуетін айқын дәлелдеген нәтиже. Ендігі мақсат – осы қарқынды сақтап, әлем чемпиондарының қатарын одан әрі көбейту.