Қарағандыда туристік агент кейпінде тұрғындарды алдаған күдікті қамалды

Қарағанды қаласының 53 жастағы тұрғыны полицияға арызданды. Ол туристік агенттік иесінің алаяқтық әрекеттерінің құрбаны болғанын мәлімдеген, деп хабарлайды El.kz интернет порталы.

Әйел көптен күткен демалысын ұйымдастыру үшін турагентке 900 мың теңге берген. Алайда уәде етілген сапар жүзеге аспай қалған.

Аталған дерек бойынша сотқа дейінгі тергеу басталды. Тергеу барысында бұл агенттікке қатысты осындай тағы бірнеше шағым тіркелгені анықталды. Қазіргі уақытта полицияға осы туристік агенттіктің қызметіне шағымданған тағы 34 азаматтың өтініші түскен. Күдікті өз әрекетін валюта бағамының күрт өсуімен және соның салдарынан туындаған қаржылық қиындықтармен түсіндірген, - деп жазылған ІІМ ақпаратында. 

Тергеу мәліметінше, жәбірленушілерге келтірілген жалпы материалдық залал шамамен 52 миллион теңгені құрап отыр. Тергеудің жан-жақты жүргізілуін қамтамасыз ету мақсатында күдікті уақытша қамауға алынды.