Қарағанды комбинаты ұлттық инвесторға берілді

Елімізде өндірістегі еңбек қауіпсіздігі мәселесі әлі де өзекті. Бұған Қарағанды облысының шахталарындағы апаттар да дәлел. Президент те осы мәселеге назар аударып, қалтасын ғана көздейтін инвесторларды сынға алды, деп хабарлайды El.kz ақпарат агенттігі.

Өндірістің техникалық жағдайына да қатаң бақылау жасап отыру қажет. Кейбір инвестор тапқан табысын тек қалтаға басқанды жөн көреді. Еңбек қауіпсіздігі, экология, өндірісті жаңғырту сияқты маңызды мәселелерге мүлде назар аударылмайды. Мұндай жағдайға бәріміз куә болдық, - деді Тоқаев.

Мемлекет басшысының сөзінше, Қарағанды комбинаты ұлттық инвесторға берілген. Себебі инвестор кәсіпорынды кешенді түрде жаңғыртпақ.

Менің тапсырмаммен Қарағанды комбинаты ұлттық инвесторға берілді. Оған берілуінің басты себебі – инвестордың кәсіпорынды кешенді түрде жаңғыртамын деген ниетінің болуы. Өндірістің жұмысын тоқтатпау және апатты жағдайға жол бермеу үшін кен орнын дереу қалпына келтіру, өндірістік қауіпсіздікті күшейту, материалдық-техникалық базаны жаңарту керек. Сондай-ақ жаңа өндірістер ашып, қосылған құны жоғары тауарлар шығару үшін ауқымды инвестиция тартқан жөн, - деді президент.

Осы орайда жоғары сапалы құрыш құю де қолға алынбақ. Осылайша көлік жасау өнеркәсібі дами түспек.

Жоғары технологиямен сапалы құрыш құю тәсілін меңгеру керек. Мұндай өнімдер көлік жасау өнеркәсібіне және басқа да салаларға қажет. Алдағы бес жылда кәсіпорын өндіріс қарқынын барынша арттырып, ТМД-да көш бастап тұрған металлургия комбинаттарының қатарына қайта қосылуы керек, - деді мемлекет басшысы.