Қан қысымын төмендететін ең пайдалы өнім түрі анықталды

Ұлыбритания мен Норвегия ғалымдары 143 мыңнан астам адамның деректерін талдап, жаңғақты тұрақты тұтыну гипертонияның даму қаупін төмендететінін анықтады. Ғалымдар күніне шамамен 25-35 грамм жаңғақ жеу пайдалы деген қорытындыға келген.

Жаңғақ – аштықты басып, ұзақ уақыт тоқ жүруге көмектесетін пайдалы тіскебасардың бірі. Алайда оның пайдасы тәбетті бақылаумен ғана шектелмеуі мүмкін. Жаңа зерттеуге сәйкес, жаңғақты күнделікті тұтыну қан қысымының жоғарылау қаупінің төмен болуымен байланысты.

Зерттеу нәтижесі нені көрсетті?

Ғалымдар 18 бен 87 жас аралығындағы 143 380 адамның қатысуымен жүргізілген сегіз ұзақ мерзімді зерттеу нәтижелерін біріктіріп, метаталдау жасаған. Бақылау кезеңінде қатысушылардың 20 665-іне гипертония диагнозы қойылған.

Талдау нәтижесінде күніне шамамен 30 грамм жаңғақ жеген адамдарда оны мүлде тұтынбайтындармен салыстырғанда гипертонияның даму қаупі 26 пайызға төмен болғаны анықталды. Ал күнделікті рационға қосымша 28 грамм жаңғақ қосу қауіптің шамамен 20 пайыз төмендеуімен байланысты болған.

Зерттеушілер жаңғақты ең көп және ең аз тұтынатын топтарды да салыстырған. Нәтижесінде жаңғақты көбірек жейтін адамдарда гипертонияның даму ықтималдығы 16 пайыз төмен болған. Дегенмен жаңғақ мөлшерін арттыру оның пайдасын да арттырады деген сөз емес. Зерттеу деректеріне сәйкес, күніне 25-35 грамм жаңғақ тұтынған жөн.

Жаңғақ қан тамырларына қалай әсер етуі мүмкін?

Ғалымдар жаңғақ тұтыну мен гипертония қаупінің төмендігі арасындағы байланыстың нақты механизмін әзірге толық түсіндіре алмайды. Дегенмен оның құрамындағы бірнеше зат қан қысымын реттеуге ықпал етуі мүмкін.

Соның бірі – L-аргинин аминқышқылы. Ағза оны азот тотығын өндіру үшін пайдаланады. Бұл зат қан тамырларының босаңсып, кеңеюіне көмектеседі. Соның нәтижесінде қанның ағзада еркін айналуына жағдай жасалады.

Жаңғақтың құрамында ішекке пайдалы бактериялардың қорегі саналатын тағамдық талшықтар да бар. Олар ыдыраған кезде пайда болатын қосылыстар қан қысымының реттелуіне оң әсер етуі мүмкін.

Бұдан бөлек, жаңғақ антиоксиданттарға бай. Олар жүрек-қан тамырлары ауруларының дамуына ықпал етуі мүмкін тотығу стресі мен қабыну үдерістеріне қарсы тұруға көмектеседі.

Жаңғақ құрамындағы магний мен калий де жүрек пен қан тамырларының қалыпты жұмысы үшін маңызды минералдар саналады.

Осылайша, зерттеу жаңғақты қалыпты мөлшерде тұрақты тұтыну мен гипертония қаупінің төмендігі арасында байланыс бар екенін көрсетті. Алайда бұл жаңғақтың өзі қан қысымының жоғарылауына жол бермейді дегенді білдірмейді. Зерттеу нәтижелері себеп-салдар байланысын түпкілікті дәлелдемейді.