Павлодарда есірткі жасырумен айналысқан шетелдік екі азамат ұсталды

Павлодар қаласында есірткі қоюмен айналысқан шетел азаматтары ұсталды, деп хабарлайды El.kz  ақпарат агенттігі ҚР ІІМ баспасөз қызметіне сілтеме жасап.

Павлодар қаласының прокуратурасы бастамашылық еткен жедел-іздестіру іс-шараларының нәтижесі бойынша полиция қызметкерлері 1987 жылы туған Түркия азаматын ұстады, одан ақ түсті ұнтақ заты бар полиэтилен пакет тәркіленген көрінеді.

Ұсталған адамның телефонын тексеру барысында есірткі салған 2 орын анықталып, онда осыған ұқсас заттары бар 2 пакет алынып отыр.

Сонымен қатар тінту барысында ұсталған адамның үйінен есірткі салынған орауыш материал және «мефедрон» заты салынған пакет тәркіленді, бұл сараптамамен расталды.

Бұл дерек СДТБТ-да ҚР ҚК 297-бабы 3-бөлігі 1,5-тармақтары (адамдар тобының алдын ала сөз байласу, ақпараттық ресурстарды пайдалану арқылы жасаған психотроптық заттардың аналогтарын өткізу мақсатында заңсыз сатып алу, сақтау, тасымалдау) бойынша тіркелген. Тергеу сотының санкциясымен азамат А. 2 айға қамауға алынды, - деп жазылған министрлік таратқан мәліметте. 

Қазіргі уақытта бұл іс бойынша сыбайласы 1982 жылы туған РФ азаматы да ұсталды. Оған қатысты сот қамауда ұстау түріндегі бұлтартпау шарасын санкциялаған.