Оқушылар мен студенттерге кешкі 8-ден кейін сабақ оқуға тыйым салынды

Вьетнамның ең ірі қаласы Хошиминде мектеп оқушылары мен студенттерге кешкі сағат 20:00-ден кейін оқу процесіне қатысуға ресми түрде тыйым салынды, деп хабарлайды El.kz ақпарат агенттігі.

Бұл шешімді жергілікті билік өкілдері жастардың шаршауын азайтып, олардың психологиялық және физикалық әл-ауқатын жақсарту мақсатында қабылдады. Хошимин қалалық білім және кәсіби даярлық департаментінің басшысы Хо Тан Мин бұл бастаманың арқасында оқушылар мен студенттер отбасымен көбірек уақыт өткізіп, өмір салтында тепе-теңдік орната алады деп санайды.

Оның айтуынша, бүгінде көптеген жасөспірімдер білім беру мекемелерінде сабақтарын түстен кейінгі 16:00–17:00 аралығында аяқтайды. Бұл оларға үйге қайтып, кешкі ас ішіп, демалып, қажет болса, қосымша сабақтарға қатысуға жеткілікті уақыт береді. Қаладағы жол кептелістері де оқушылардың уақытын ұзартып отырғандықтан, бұл фактор да жаңа тәртіпті енгізуге себеп болған.

Қаладағы білім беру жүйесіне қатысты деректерге сүйенсек, Хошиминдегі мектептердің 93 пайызы екі ауысыммен жұмыс істейді. Сонымен қатар, қалада шамамен 1300 репетиторлық орталық жұмыс істейді, ал 3300-ге жуық мұғалімнің қосымша сабақ өткізуге рұқсаты бар. Билік өкілдері соңғы он жыл ішінде жеке репетиторлықты реттеуге тырысып келеді. Бұған дейін бастауыш сынып оқушыларына қосымша сабақтарға баруға тыйым салынса, мектеп директорларына мұғалімдерге негізгі оқу уақытында толыққанды білім беру міндетін еске салатын арнайы нұсқаулықтар таратылған.

Бұл жаңа тәртіп Вьетнамда білім беру сапасын арттырумен қатар, жастардың денсаулығы мен дамуына қолайлы жағдай жасауға бағытталған маңызды қадам ретінде бағалануда.