Онлайн-банк деректерін қалай қорғауға болады?

Жеке деректердің таралып кетуі оларды үшінші тұлғалардың заңсыз пайдалануына әкелуі мүмкін. Киберқылмыскерлер банк шоттарына және құпия ақпаратқа қол жеткізу үшін фишинг секілді түрлі алаяқтық тәсілдерді қолданады. Қауіпсіздікті қамтамасыз ету үшін қарапайым цифрлық гигиена ережелерін сақтау маңызды, деп хабарлайды El.kz интернет порталы.

Нені ешқашан жіберуге немесе жариялауға болмайды:

• Жеке басын куәландыратын құжаттардың көшірмелерін.
• Банктік картаның толық деректерін, әсіресе CVV-кодты, SMS-кодтарды және құпия сөздерді.
• Белгісіз немесе күмәнді сілтемелерге өтуден аулақ болыңыз.
• Тексерілмеген көздерден лицензиясыз қосымшалар орнатпаңыз.

Құрылғыларды тұрақты тексеріп отырыңыз:

• Антивирус бағдарламасын уақтылы жаңартыңыз.
• Спам мен күмәнді хаттарды жойып, қажетсіз жіберушілерді бұғаттаңыз.
• Кэшті тазартып, қажетсіз сервистер мен таралымдардан бас тартыңыз, бұл деректердің таралып кету қаупін азайтады.

Құпия сөздер қауіпсіздігі:

• Бір құпия сөзді бірнеше аккаунтқа қолданбаңыз.
• Сенімді пароль кемінде 10 таңбадан тұруы тиіс: бас және кіші әріптердің, цифрлардың және арнайы белгілердің үйлесімі болуы қажет.

Қауіпсіз интернет қолдану:

• Ашық әрі жалпыға қолжетімді Wi-Fi арқылы интернет-банкингке кірмеңіз, мұндай желілер қауіпсіз болмайды.

Есте сақтаңыз:

• Жеке деректерді ешқашан бейтаныс адамдарға айтпаңыз. Олар өздерін банк қызметкері, әлеуметтік қызмет не құқық қорғау органдарының өкілі ретінде таныстырса да, құпия ақпаратты беруге болмайды.