Омыртқаға ең көп зиян келтіретін әдеттер аталды

Бас пен дене қалпының бұзылуы, ұзақ уақыт қозғалмай отыру және ұйқыға арналған дұрыс таңдалмаған жастық – омыртқа саулығына елеулі қауіп төндіреді, деп хабарлайды El.kz интернет порталы.

Бұл туралы Metropoles басылымына берген сұхбатында ортопед Джанкарло Мариано мәлімдеді.

Смартфонға үңілу — мойынға артық салмақ түсіреді

Маманның айтуынша, адамдар смартфон мен басқа гаджеттерді үнемі басын төмен иіп пайдалану арқылы мойын омыртқасына шамадан тыс жүктеме түсіреді. Адам басының орташа салмағы 4,5–5,5 кг аралығында. Ал әр сантиметрге төмен иілген сайын, бұл салмақ екі, тіпті үш есе артады.

Мойын бұлшықеттері бастың тік қалыптағы салмағына бейімделген. Алайда оны алға немесе артқа жиі еңкейту — бұлшықетке және омыртқаға зиян, – дейді Мариано.

Көп отыру мен аз қозғалу — омыртқа бұлшықеттерін әлсіретеді

Көпшілігіміз офисте немесе үйде ұзақ уақыт отырып жұмыс істейміз, бұл кезде бел, арқа және мойын бұлшықеттері әлсірей бастайды. Физикалық белсенділіктің жеткіліксіздігі — дұрыс қалыпты ұстауға жауапты бұлшықеттердің тонусын төмендетеді. Мұның соңы арқа аурулары мен қисаюларға әкелуі мүмкін.

Сондай-ақ, ұзақ уақыт бір орында қозғалмай тұру да зиянды. Дәрігер ұзақ сапарға шыққанда немесе кезек күткенде ара-тұра қозғалып, жаттығу жасап тұруға кеңес береді.

Кей жастықтар — ұйқы кезінде бұлшықетті босаңсытпайды

Түнгі демалыс кезінде дене толық босаңсуы керек. Алайда ыңғайсыз жастық бұл процеске кедергі келтіріп, таңертең мойын, арқа, иық тұсында ауырсыну мен жайсыздық туындатады. Сондықтан дәрігер ортопедиялық жастық қолдануды ұсынады.

Омыртқа саулығын сақтау үшін не істеу керек?

• Смартфонды көз деңгейінде ұстап, басты үнемі төмен түсірмеу;
• Әр 30–40 минут сайын орныңыздан тұрып, жеңіл жаттығу жасау;
• Дене белсенділігін арттыру – жүзу, жүру, жеңіл фитнес;
• Ұйқы кезінде мойынға жайлы, анатомиялық жастықты қолдану;
• Ұзақ сапарлар кезінде әр 1–2 сағат сайын үзіліс жасау.