Невролог тез ұйықтап қалудың оңай әдісін атады

Қол саусақтарымен жасалатын қарапайым техника тезірек ұйқыға кетуге көмектесуі мүмкін. Бұл туралы америкалық невропатолог Джеймс Паркер HuffPost басылымына берген сұхбатында айтты, деп жазады El.kz интернет порталы.

Дәрігердің сөзінше, әдістің мақсаты – стрессті азайту және кешкі уақытта босаңсуға жағдай жасау. Жаттығуды орындау үшін өзіңізге ыңғайлы қалыпты таңдаңыз: креслода отыруға немесе төсекке жатуға болады. Содан кейін бір қолды көтеріп, саусақтарды кеңінен ашып, екінші қолдың сұқ саусағымен әрбір саусақтың сыртқы сызығын баяу бойлай жүргізу қажет – бас бармақтан бастап шынашаққа дейін.

Маманның айтуынша, бұл жаттығудағы басты элемент – тыныс алу.

Әр қимылды терең әрі бірқалыпты тыныспен үйлестіру маңызды. Саусақ бойымен жоғары қозғалғанда мұрын арқылы тыныс алып, төмен түскенде ауыз арқылы дем шығару қажет, - деп түсіндірді Паркер.

Сондай-ақ, әдіс адамнан сезімдерге назар аударуды талап етеді. Бұл ойдың артық ағымын тоқтатып, мазасыздықты азайтуға көмектеседі. Әдетте дәл осы жайт адамға ұйқыға кетуге кедергі жасайды.