Мұрат Нұртілеу шетелдік компания өкілімен инвестиция жобасын талқылады

Премьер-министрінің орынбасары - сыртқы істер министрі Мұрат Нұртілеу «TUBACEX IBF Kazakhstan» испандық компаниясының бас директоры Стефано Манфредимен кездесу өткізді, деп хабарлайды El.kz ақпарат агенттігі.

Келіссөздер барысында Қазақстанда Орталық Азияда тот баспайтын болаттан және никель қорытпаларынан жасалған жіксіз құбырлар шығаратын алғашқы зауыт құру мәселелері талқыланды. Бұл жобаны іске асыру Қазақстанның жоғары технологиялық өнеркәсіпті дамыту және металлургия саласында импортты алмастыру әлеуетін кеңейту жөніндегі стратегиялық басымдықтарына сәйкес келеді.

М.Нұртілеу Қазақстан Үкіметінің инвестициялық жобаны іске асыруда жан-жақты қолдау көрсетуге дайындығын атап өтіп, жаңа зауыттың іске қосылуы елдің өнеркәсіптік секторын нығайтуға және жаңа жұмыс орындарын құруға елеулі үлес қосатынын айтты.

Испанияда негізі қаланған «TUBACEX» компаниясы энергетика, мұнай-газ және мұнай-химия секторларына арналған тот баспайтын болаттан және никель қорытпаларынан жасалған жіксіз құбырларды өндіруге маманданған. Бүгінгі таңда компанияда әлем бойынша 24 өндірістік кәсіпорын және 14 сервистік орталық бар. 2022 жылдан бастап «TUBACEX IBF Kazakhstan» Атырау қаласында құбырларға арналған қосқыш элементтерді өндіруге маманданып, өндірісті оқшаулау процестеріне белсенді қатыса отырып, қызметін табысты жүзеге асыруда.