Мемлекет басшысы елімізде футболды дамыту керектігін айтты

Президент елімізде стадиондарды жаңғыртуды тапсырды. Мемлекет басшысы бұл істе демеушілер тарту керектігін алға тартты, деп хабарлайды El.kz ақпарат агенттігі.

Елімізде футболды дамытуға баса мән беру керек деп санаймын. Демеушілер қаржысы есебінен облыстық стадиондардың көпшілігін жаңғырту қажет немесе жаңа футбол стадиондарын салуды қолға алған жөн.

Әрбір облыс, аудан орталығында, кент пен ауылда балаларға арналған футбол алаңы болуы тиіс. Бұл – алдағы екі жылдың міндеті. Оның орындалуын тексереміз, - деді Тоқаев.

Президент осы арқылы бүкіл әлемге танымал әрі әлеуметтік, бұқаралық спорт саналатын осы ойынды жаңа деңгейге көтере алатынымызды тілге тиек етті.

Балаларды, жасөспірімдерді футболға қызықтыру арқылы лудомания, нашақорлық мәселесін біршама шешуге болады. Осы салаға жауапты министрлік, Футбол федерациясы, жергілікті атқарушы органдар, кәсіпкерлер клубтық футболды коммерцияландыруға нақты кірісуі керек. Клубтар облыстық бюджеттерге ғана арқа сүйемей, шетелдердегі секілді өздері де табыс табуды үйренуі керек, - деді президент.

Мемлекет басшысы кәсіпкерлерді футболға қаржы құюға шақырды.

Сондықтан мен кәсіпкерлерді клубтық футболға бизнес ретінде қарауға шақырамын. Футбол клубтары жекеменшікке өтпей, іс алға баспайды. Бұл – әлемдік тәжірибе. Клубтар жекеменшік болса, шетел спортшыларын шақыру құқығына ие болады.

Спортты насихаттау, оны әсіресе балалар мен жасөспірімдер арасында дәріптеу – ұлт саулығының кепілі. Соңғы жылдары мемлекет қолдауының нәтижесінде балалар спорты қарқынды дами бастады. Бірақ, бұл – жеткіліксіз. Сондай-ақ бизнес өкілдері өскелең ұрпақты дене шынықтыруға және спортқа баулу ісіне зор үлес қоса алады деп ойлаймын, - деп атап өтті президент.