Майқайыңда жер астына түсіп кеткен автобусты іздеу жұмыстары тоқтауы мүмкін

Павлодар облысындағы Майқайыңда жер астына түсіп кеткен автобусты іздестіру жұмысы одан әрі жалғаспауы мүмкін, деп хабарлайды Еl.kz ақпарат агенттігіне Kazinform-ға сілтеме жасап. 

Өңірлік төтенше жағдайлар департаментінен хабарлағандай, бүгін мамандар геологиялық радармен ойық түбін кезекті рет сканерлеген.

Геологиялық сканерден алынған мәліметтерді зерделей келгенде, шұңқыр түбіндегі тау жыныстарының құрылымы өзгеріп, босаңси бастағаны анықталды. Нысанның жанында және астында қуыстар мен бос кеңістіктер бар. Кез келген сәтте тау жыныстары төмен опырылып түсіп кетуі мүмкін. Қазіргі күні ойықтың барлық периметрін тексеріп шығуға арналған комиссия құрылып жатыр. Комиссия тау массасын толықтай барлап, іздестіру жұмыстарын әрі қарай жалғастыру керек пе, жоқ па, соны анықтайды, - деп мәлімдеді төтенше жағдайлар департаментінің баспасөз қызметі.

Бүгін апат орнында экскватор мен мамандар әдеттегідей режімде жұмыс істеді. Еске сала кетейік, кеше жұмыстар жүріп жатқан жерде терең ойық пайда болып, құтқарушылардың жұмысы шұғыл түрде тоқтатылып отыр.