Мас болып мотоцикл айдап, кісі өліміне себепші болған Қостанай тұрғыны сотталды

Қостанай аудандық сотында мас күйінде көлік жүргізіп, жол апатын жасаған, осылайша абайсызда адам өліміне әкеп соқтырған К-ға қатысты қылмыстық іс қаралды, деп хабарлайды El.kz ақпарат агенттігі.

Соттың мәліметінше, іс Қылмыстық кодекстің 345-1-бабының 3-бөлігі бойынша қаралған.

4 сәуірде Қостанай ауданы Московский ауылында жүргізуші К. мас күйінде мотоцикл тізгіндеп келе жатып, қарсы жолаққа шығып кеткен. Сөйтіп қарсы бағытта келе жатқан автокөлікпен бетпе-бет соқтығысқан.

Жол-көлік оқиғасының салдарынан сотталушы К-ның мотоцикл кузовының жолаушы орындығында отырған жолаушы Л. алған жарақатынан оқиға орнында көз жұмды.

Прокурор сотталушыны 10 жылға көлік басқару құқығынан айыра отырып, 3 жылға бас бостандығынан айыруды сұрады.

Жәбірленуші - марқұмның анасы сотта сотталушыға бас бостандығынан айырмайтын жаза тағайындауды сұрады.

Сотталушы өз кінәсін және талаптарын толық мойындап, жәбірленушіден кешірім сұрады.

Сот жаза тағайындау кезінде сотталушы К-ның жауапкершілігі мен жазасын жеңілдететін мән-жай ретінде өз кінәсін ашық мойындауын және жасаған ісіне өкінетінін, сондай-ақ кәмелетке толмаған баласының барын ескерді.

Сотталушы 10 жыл мерзімге көлік басқару құқығынан және 3 жылға бас бостандығынан айырылды. Ол жазасын ең төменгі қауіпсіздік қылмыстық-атқару жүйесі мекемесінде өтейді.

Үкім заңды күшіне енген жоқ.