Маңғыстау студенттер үшін «Құтқару жұмыстары» орталығы ашылды

Маңғыстау жоғары политехникалық колледжінде «Төтенше жағдайда қорғау» мамандығын үйрететін «Құтқару жұмыстары» құзыреттілік орталығы ашылды, деп хабарлайды El.kz интернет порталы.

Бұл бастама «Жұмысшы мамандықтар» жылы аясында жүзеге асырылған. Сондай-ақ, төтенше жағдайда қорғану мамандығы бойынша «Құтқару жұмыстары» құзыреттілік алаңы мен арнайы шеберхана пайдалануға беріліп отыр. Жаңа оқу алаңы заманауи құрал-жабдықтармен жабдықталып, студенттерге практикалық дағдыларды нақты жағдайларда меңгеруге мүмкіндік ашады. 

Салтанатты рәсім барысында колледждің білім алушылары өз мамандықтары бойынша құтқару жұмыстарын ұйымдастыруға арналған демонстрациялық жаттығулар көрсетті. Шараға қатысушылар жаңадан ашылған алаң мен шеберхананың материалдық-техникалық базасына жоғары баға берді.