Көздің көруін жақсарту үшін қандай жаттығулар пайдалы

Қазіргі уақытта адамдардың басым бөлігі смартфон, компьютер және теледидар алдында ұзақ уақыт өткізеді. Бұл жағдай көздің шаршауына, құрғауына, көру қабілетінің әлсіреуіне әкелуі мүмкін. Көз дәрігерлері қарапайым жаттығуларды күнделікті жасау арқылы көруді жақсартуға және көздің шаршауын азайтуға болатынын айтады, деп жазады El.kz интернет порталы.

Пальминг әдісі – көзді демалдырудың ең тиімді тәсілдерінің бірі. Екі алақаныңызды бір-біріне үйкеп жылытқан соң жұмулы көзіңізді алақаныңызбен жабыңыз. 1-2 минут бойы қараңғылықта демалу көз бұлшықеттерін тынықтырады.

Фокус жаттығуы да өте пайдалы. Ол үшін терезеден алыстағы бір нысанға бірнеше секунд қараңыз, содан кейін жақын тұрған затқа назар аударыңыз. Мұны бірнеше рет қайталау көздің аккомодациясын, яғни жақыннан алысқа тез бейімделу қабілетін күшейтеді.

Көру жүйесін сергітетін тағы бір әдіс - көзді айналдыру жаттығуы. Алдымен жоғары-төмен, кейін оңға-солға қозғалтасыз. Бұдан кейін сағат тілі бағытымен және кері бағытта айналдырып, көз бұлшықеттерінің қан айналымын жақсартуға болады.

Жиі жыпылықтату да көзге пайдалы. Әсіресе компьютер алдында отырған кезде көздің құрғауы жиі кездеседі. Сол себепті әдейі жыпылықтатып тұру көз жасы қабатын жаңартып, көздің табиғи ылғалдылығын сақтайды.

Көз жаттығуларының тағы бірі - "сегіздік" әдісі. Көзбен ауада үлкен сегіздік сызу арқылы көздің икемділігі артып, жүйкенің сергектігі жақсарады. Бұл жаттығуды күніне бірнеше рет жасау ұсынылады.

Сонымен қатар, дәрігерлер жаттығумен қатар дұрыс жарықта жұмыс істеуді, әрбір 40–50 минут сайын үзіліс жасауды және дәруменге бай тағамдарды жиі тұтынуды ұсынады. Көзге қамқорлық жасау - көру қабілетінің ұзақ уақыт бойы жақсы сақталуының ең қарапайым жолы.