Коммуналдық қызмет тарифтері төмендетілді

Еліміздің бірқатар өңірлерінде мамыр айының қорытындысы бойынша жалпы сомасы шамамен 4,3 млрд теңгеге төмендетілген тарифтер бекітілді, деп хабарлайды El.kz Табиғи монополияларды реттеу комитетінің баспасөз қызметіне сілтеме жасап.

Табиғи монополиялар туралы заңнамаға сәйкес табиғи монополиялар субъектісі жыл сайын есепті кезеңнен кейінгі жылдың 1 мамырынан кешіктірмей уәкілетті органға бекітілген тарифтік сметаның орындалуы туралы, бекітілген инвестициялық бағдарламаның орындалуы туралы есептер беруге міндетті.

Бүгінгі күні есептерді қарау нәтижелері бойынша 30 ТМС бойынша міндеттемелердің орындалмағаны анықталды, оның ішінде «Астана-Энергия» АҚ, «Астана-Теплотранзит» АҚ, «Талдықорғантеплосервис» КМК сияқты ірі монополист субъектілер және басқалары бар. Нәтижесінде, еліміздің 7 өңірінде (Нұр-Сұлтан, Алматы облысы, ШҚО, Жамбыл облысы, Қостанай облысы, Маңғыстау облысы, Павлодар облысы) жылумен жабдықтау, сумен жабдықтау, су бұру, электрмен жабдықтау және кірме жолдарды ұсыну сияқты қызметтер бойынша жалпы сомасы шамамен 4,3 млрд теңгеге уақытша өтемдік тарифтер бекітілді.

Жылумен жабдықтау - 17%, сумен жабдықтау - 7,4%, су бұру - 3%, электрмен жабдықтау - 18,6% төмендеді.