Италиядағы су тасқынынан қайтыс болған саны 14 адамға жетті

Италияның солтүстігіндегі Эмилия-Романья аймағында су тасқынынан қаза тапқандар саны 14-ке жетті, деп хабарлайды El.kz ақпарат агенттігі.

Астана арнасының мәліметінше, Равенна қаласының билігі екі шағын қаланың тұрғындарын дереу эвакуациялау туралы шешім қабылдады. Халықты саяхаттаудан аулақ болуға шақырып, қауіп деңгейі әлі де ең жоғары қызыл деңгейге жеткенін хабарлады. 

Аймақтың эвакуацияланған 15 мың тұрғынының жартысына жуығы өткен түнді қонақүйлерде немесе асығыс жабдықталған спорт залдарында өткізуге мәжбүр болған.

Зардап шеккен аймақтың көптеген қалаларында адамдарды ыстық тамақпен қамтамасыз ететін жылжымалы асханалар жұмыс істеп жатыр. Су аздап тартылған жерлерде тұрғындар үйлерін тазалауға кірісті, дегенмен көптеген тұрғындар су деңгейінің жоғары болуынан әлі күнге дейін далаға шыға алмай отыр.

Равеннаның өзінде нөсер әлі тынбай тұр, қала мэрі Массимо Изола қаланы қоршап тұрған төбелерде орналасқан ауылдардағы апатты жағдай туралы мәлімдеді. Көшкіннің жүру қаупі жоғары, бұл аймақтарға құтқарушылардың жетуі өте қиын болып отыр.

Дегенмен, жұмыс жалғасуда, құтқарушылар су тасқынынан зардап шеккендерді әлі эвакуациялап жатыр. Италияның солтүстігінде 36 сағат бойы жауған толассыз жауынның салдарынан жарты жылдық жауын-шашын түсіп, келтірілген шығын миллиардтаған еуроға бағаланып отыр.

Су тасқыны салдарынан Имоладағы «Формула-1» жарысын да тоқтатуға мәжбүр болды.