iPhone жаңартудан кейін неге қызып кетеді және оны қалай азайтуға болады

Кейбір iPhone пайдаланушылары iOS жаңартуын орнатқаннан кейін смартфонның бұрынғыдан көбірек қызатынын байқайды. Бұл жағдай әсіресе ескі үлгідегі құрылғыларда жиі кездеседі. Мамандардың айтуынша, алғашқы бірнеше күнде мұндай құбылыс қалыпты саналады. Себебі жүйе жаңартудан кейін бірқатар ішкі процестерді қайта іске қосады.

Неліктен iPhone қызады?

Жаңа iOS орнатылған соң құрылғы фотосуреттерді, файлдарды және басқа да деректерді қайта индекстейді. Сонымен қатар бет-бейнені, нысандарды тану және іздеу қызметтері қайта өңделеді. Осындай процестер процессорға қосымша жүктеме түсіріп, смартфонның уақытша қызуына себеп болуы мүмкін.

Егер бірнеше күн өткеннен кейін де құрылғы күнделікті қолданғанда қатты қыза берсе, кейбір баптауларды өзгерту арқылы жүйеге түсетін жүктемені азайтуға болады.

Көптеген қосымшалар жабылғаннан кейін де интернет арқылы деректерін жаңартып отырады. Бұл процесс аккумулятор қуатын көбірек жұмсап, процессордың жұмысын арттырады.

Өшіру жолы: Параметрлер → Негізгі → Қолданбаларды фондық жаңарту бөліміне кіріп, «Өшіру» немесе «Wi-Fi» режимін таңдаңыз.

Кейбір қосымшалар GPS қызметін үнемі пайдаланады. Бұл да құрылғының қызып, батареяның тез таусылуына әсер етуі мүмкін.

Не істеу керек?

Параметрлердегі «Құпиялық және қауіпсіздік» → «Геолокация қызметтері» бөліміне кіріп, жиі қолданылмайтын бағдарламалар үшін «Қолданба пайдаланылған кезде» режимін таңдаңыз. «Әрқашан» параметрін тек қажет қосымшаларға ғана қалдырған дұрыс.

iPhone жаңартудан кейін фотосуреттерді талдап, іздеу жүйесін жетілдіру үшін қосымша өңдеу жүргізеді. Егер бұл функцияларды сирек пайдалансаңыз, кейбірін өшіруге болады.

Мысалы «Кеңейтілген визуалды іздеу» немесе Siri ұсыныстарын қажетсіз қолданбалар үшін өшіру процессорға түсетін жүктемені азайтады.

iOS интерфейсіндегі анимациялар мен мөлдірлік әсерлері графикалық процессорды үздіксіз пайдаланады. Әсіресе ескі модельдерде бұл қосымша жүктеме тудыруы мүмкін.

Ұсыныс:

• «Мөлдірлікті азайту» функциясын қосыңыз.
• «Қозғалысты азайту» параметрін белсендіріңіз.
• Бұл интерфейстің жұмысын жеңілдетіп, энергия шығынын төмендетуге көмектеседі.

Always-On Display мүмкіндігі бар модельдерде экран құлыпталған кезде де ақпарат көрсетіліп тұрады. Бұл ыңғайлы болғанымен, аккумуляторға қосымша салмақ түсіреді.

Қажет болмаса, бұл функцияны өшіріп, экранның автоматты жарықтық режимін қосқан жөн.

Қашан сервиске жүгіну керек?

Егер жаңартудан бірнеше күн өткеннен кейін де iPhone қалыпты пайдалануда қатты қызатын болса:

• аккумулятордың күйін тексеріңіз;
• барлық қолданбаларды соңғы нұсқаға жаңартыңыз;
• құрылғыны қайта іске қосыңыз;
• мәселе шешілмесе, ресми сервис орталығына жүгініңіз.

Ал ойын ойнағанда, 4K бейне түсіргенде, навигация қолданғанда немесе жылдам қуаттау кезінде құрылғының қызуы қалыпты құбылыс саналады.

Мамандар смартфонды тез салқындату үшін тоңазытқышқа немесе мұздатқышқа салуға кеңес бермейді. Температураның күрт өзгеруі құрылғы ішінде конденсат түзіп, электрондық бөлшектердің зақымдануына әкелуі мүмкін.

Оның орнына:

• қорғаныш қаптамасын шешіңіз (егер ол жылуды ұстап тұрса);
• ауыр қосымшаларды жабыңыз;
• құрылғыны күннің тікелей сәулесінен алыстатыңыз;
• смартфонның табиғи жолмен салқындауына мүмкіндік беріңіз.

Егер экранда «iPhone пайдалану алдында салқындауы керек» деген ескерту пайда болса, бұл құрылғының ішкі бөлшектерін қорғау үшін өнімділікті уақытша шектегенін білдіреді. Мұндай жағдайда телефон толық салқындағанша пайдаланбаған дұрыс.

Біз бұған дейін iPhone бағасы 1 миллион теңгеден асатыны туралы жазған едік.