Футболдан әлем чемпионаты: басты фавориттер кімдер?

2026 FIFA World Cup басталмай жатып-ақ әлем назарын өзіне аударды. Бұл тек футбол мерекесі емес, саясат, көші-қон, қауіпсіздік, климат және миллиардтаған доллар айналған алып индустрияның қақтығыс алаңына айналғалы тұр. АҚШ, Мексика және Канада бірлесіп қабылдайтын мундиаль тарихтағы ең ауқымды әрі ең даулы әлем чемпионаты болуы мүмкін деген пікір күшейіп келеді.

HuffPost басылымы турнир басталғанға дейінгі әрбір даулы оқиға мен күтпеген жаңалықты арнайы тікелей блог форматында жариялап отыр. Себебі бұл жолғы әлем чемпионаты футболдан әлдеқайда үлкен тақырыпқа айналды.

Саясат араласқан мундиаль

Әлем чемпионаты төңірегіндегі басты әңгімелердің бірі – АҚШ-тағы саяси ахуал. Дональд Трамп әкімшілігінің көші-қонға қатысты қатаң саясаты турнир атмосферасына әсер етуі мүмкін деген қауіп бар. Кейбір елдердің жанкүйерлері АҚШ-қа кіруде қиындықтарға тап болуы ықтимал.

Сонымен қатар Иран құрамасының турнирге қатысуы да күмән тудырып отыр. Сарапшылар Трамптың әскери-саяси ұстанымы аясында Иранға қатысты жаңа шектеулер енгізілуі мүмкін екенін айтады.

Трамптың FIFA президенті Джанни Инфантиномен тығыз қарым-қатынасы да қызу талқылануда. Бұған қоса АҚШ пен ұйымдастырушы елдер – Мексика мен Канада арасындағы сауда тарифтері мен саяси риторикадан туған шиеленістер турнирдің сыртқы атмосферасын күрделендіріп жіберді.

Көші-қонға қарсы саясат аясында ойындар кезінде Immigration and Customs Enforcement қызметкерлері стадион маңында болуы мүмкін деген ақпарат жанкүйерлер арасында алаңдаушылық туғызды. Ал билет бағасының күрт қымбаттауы әлеуметтік желілерде ашу-ыза тудырып жатыр.

Аптап ыстық тағы проблемаға айналуы мүмкін

Климат мәселесі де назардан тыс қалған жоқ. АҚШ соңғы рет әлем чемпионатын 1994 жылы қабылдағанда аптап ыстық футболшылар мен жанкүйерлер үшін үлкен қиындық туғызған еді. Биыл да жоғары температура мәселесі қайта көтерілуде. Кейбір матчтар күндізгі уақытта өтетіндіктен, ойыншылардың физикалық дайындығы ерекше рөл атқармақ.

Тарихтағы ең үлкен әлем чемпионаты

Бұл жолғы мундиаль рекорд жаңартқалы тұр. Турнирге алғаш рет 48 ұлттық құрама қатысады. Үш елде жалпы саны 104 матч өтеді. Бұл – FIFA тарихындағы ең ірі әлем чемпионаты.

Турнирдің ашылу ойыны 11 маусым күні әйгілі Mexico City Stadium стадионында өтеді. Алаң иелері Мексика құрамасы Солтүстік Африка командасымен кездеседі.

Ал АҚШ құрамасы топтық кезеңде 12 маусымда Лос-Анджелесте Парагваймен, 19 маусымда Сиэтлде Аустралиямен, ал 25 маусымда қайтадан Лос-Анджелесте Түркия құрамасымен ойнайды.

Финал 19 шілдеде MetLife Stadium аренасында өтеді. Турнир кезінде стадион атауы уақытша New York/New Jersey Stadium болып өзгертіледі.

Кім фаворит?

Қазіргі Еуропа чемпионы Испания құрамасы басты фавориттердің бірі саналады. Сонымен бірге қазіргі әлем чемпионы Аргентина, Франция, Англия және Бразилия құрамалары да басты үміткерлер қатарында.

Англия құрамасы жақында әлем чемпионатына баратын ойыншылар тізімін жариялап, бірнеше тосын шешім қабылдады. Бас бапкер Томас Тухель Фил Фоден, Коул Палмер және Гарри Магуайр секілді жұлдыздарды құрамадан тыс қалдырды.

Ал Пеп Гвардиоланың маусым соңында «Манчестер Сити» клубынан кететінін жариялауы әлем футболындағы ең үлкен жаңалықтардың біріне айналды. Бұл шешім көптеген ағылшын ойыншыларының психологиялық дайындығына да әсер етуі мүмкін деген пікірлер айтылып жатыр.

Месси жарақаты Аргентина жанкүйерлерін алаңдатты

Әлем назарындағы басты тақырыптың бірі – Лионель Мессидің жағдайы.

«Интер Майами» капитаны жуырда «Филадельфия Юнионға» қарсы матчта жарақат алып қалуы мүмкін деген күдік туғызды. Кездесудің 70-минутында аргентиналық шабуылшы сол жақ санының жоғарғы бөлігін ұстап қалған. Үш минуттан кейін ол алаңнан кетіп, орнына Матео Сильветти шықты.

Дегенмен команда бапкері Гильермо Хойос жағдайдың аса ауыр емес екенін айтты. Оның сөзінше, бұл жарақаттан гөрі шаршауға көбірек ұқсайды.

Месси биыл MLS маусымында тамаша форма көрсетіп жүр. Ол 14 матчта 12 гол соғып, 8 нәтижелі пас берген. Жалпы алғанда «Интер Майами» сапында 67 ойында 62 гол және 45 ассист тіркеп үлгерді.

Аргентина құрамасы әлем чемпионатына дейін екі жолдастық матч өткізеді: 6 маусымда Гондураспен, 9 маусымда Исландиямен кездеседі. Ал топтық кезеңдегі алғашқы матчта 16 маусым күні Канзас-Ситиде Алжирге қарсы ойнайды.