Еліміздің мектептерінде ата-аналарға арналған академиялар ашылады

Қазақстан мектептерінде ата-аналарға арналған академиялар жұмысын бастайды, деп хабарлады El.kz ақпарат агенттігі.

Себебі үйінде мектеп оқушысы бар 60 пайызға жуық ата-ана бала тәрбиесіне қатысты психологиялық және педагогикалық көмекке мұқтаж. Пандемиядан кейінгі кезеңде жүргізіліген зерттеу нәтижесінде осындай мәліметтер алынды. Бұл туралы Үкімет кулуарында оқу-ағарту министрі Ғани Бейсембаев айтты.

Тәрбие отбасында басталып, мектепте жалғасады, осыған байланысты ата-аналарды қолдау мақсатында қыркүйекте ата-аналар академиясын құру туралы шешім қабылдадық. Ол жерде біз ата-аналарды оқытамыз, - деді ведомство басшысы.

Бұған дейін министр Бейсембаев қазақстандық оқушылардың жазғы каникулы өзге дамыған елдерге қарағанда ең ұзаққа созылатынын айтқан болатын. Елімізде биыл оқу жылы 36 аптаға дейін созылды, бұған дейін 34 апта болып келген.