Еліміз бойынша 300 мыңнан астам оқушы алғаш рет мектеп табалдырығын аттайды

1 сәуірден бастап 1-сыныпқа құжат қабылдау басталған болатын. Бүгінгі күнге дейін еліміздің мектептеріне 312 000 бала қабылданды, деп хабарлайды El.kz интернет порталы.

Оқу-ағарту министрлігінің мәліметінше, олардың 70%-ы мемлекеттік тілде оқуды таңдап отыр. Сондай-ақ, жаңа оқу жылынан бастап Қазақстанда алғаш рет барлық мектептер мен колледждерде балалар мен жасөспірімдер арасындағы буллинг оқиғаларын азайтуға, білім беру ұйымдарында қауіпсіз, қолдаушы және өзара құрметке негізделген орта қалыптастыруға бағытталған отандық «ДосболLIKE» профилактикалық бағдарламасы енгізіледі.

Бағдарлама балалардың әл-ауқаты индексінің қағидаттары мен халықаралық және отандық нормативтік-құқықтық актілерге сәйкес әзірленген және буллингке қарсы күрестегі үздік халықаралық тәжірибелерге сүйенбек. 

Бағдарламаның апробациясы еліміздің 9 өңіріндегі 50 мектепте жүргізіліп, буллингтің алдын алу жүйелері құрылды. Апробация нәтижесінде ең тиімді тәжірибелер Астана, Алматы қалалары мен Абай, Жамбыл облыстарының мектептерінде байқалды.